(AP) — Un grabacion di video di ex-presidente Mericano, Donald Trump siendo cuestiona tocante e acusacionnan di violacion contra su persona a bira publico pa prome biaha ayera, dunando un bista di e rechasonan enfatico, hopi biaha colorido, di e Republicano.
E hurado por a mira e video di e interogacion di Trump na october 2022 durante ultimo dianan di e huicio pa un demanda entrega den su contra pa columnista E. Jean Carroll. Transcripcionnan por escrito di e testimonio di Trump anteriormente ya tabata publico, pero no e grabacion mes.
A pone e video disponible ayera pa organisacionnan noticiero cubriendo e proceso.
E video ta mustra Trump contestando pregunta. El a referi na e acusacion di Carroll cu el a viol’e den un tienda luhoso na Manhattan como “un mentira falso y askeroso.”
“E ta un desgracia. Francamente e ta un desgracia cu por trece dilanti algo asina,” Trump a bisa. El a reitera cu Carroll “no ta mi tipo” pero tambe a confundie pa su di dos esposa, Marla Maples, ora a mustr’e un potret di e conociendo Carroll y su esposo e tempo ey na un evento den añanan 1980.
Tur testimonio planea pa e huicio a conclui diahuebs, habriendo caminda pa argumentonan di clausura di e abogadonan tuma lugar dialuna, a menos cu bin un decision di Trump pa testigua na ultimo momento.
