E sentencia di Corte di Husticia di e Islanan den e caso entre Pais Aruba, Natura NV y di otro banda fundacion ABC, contrario na nos propio titulo, no tabata un victoria total pa gobierno y e empresa hotelero. E tres hueznan a considera cu gobierno mester a haya razon encuanto e tereno cu segun nos ley di desaroyo teritorial ta denomina ‘strand’ (playa, beach), pero a confirma e prohibicion pa e otro area cu ta caracteriza como ‘zona marino’ y cu no por bira victima di e obsesion gubernamental y empresarial di destrui naturaleza na fabor momentaneo di supuesto desaroyo economico. Aki ta bin aden consideracion cu mester a haci hopi aña pasa caba, tocante ‘sobredesaroyo’ cu finalmente, envez di un beneficio, ta converti den e enemigo principal di e propio desaroyo sostenible di turismo. Te awe ainda nos no a yega di tende ningun sonido di parti di gobierno di ta consciente di esaki, y lo mester teme cu despues di e veredicto parcialmente negativo pa gobierno, lo sigui move cielo y tera pa logra cambia destinacion di e tereno cu awor a keda prohibi pa e sentencia di corte. Cu tempo e hotel lo haya su gana, independientemente si un proximo gobierno lo desea otro, pasobra e gobierno actual probablemente lo prepara fundeshi pa e siguiente caso, unda e gobierno nobo ey lo keda confronta dilanti huez cu e compomisonan haci pa e anterior, cu ta mara nan man. No bisa cu no ta asina, no ta esey ta e practica cu nos a mira repiti tanto biaha caba?

Esaki no ta solamente un victoria – parcial y momentaneo– pa e fundacion, pero ta significa tambe e necesidad di tira un vista atrobe riba otro areanan di igual categoria. Esaki ta por ehemplo e caso di e diferente partinan di costa unda tin – ainda – vegetacion di mangel. E partinan aki, casi sin excepcion, ta den peligro grandi di extincion, y no solamente esey, sino sin un minimo señal di maneho drechi y na tempo di banda gubernamental. Tuma por ehemplo e parti di costa entre aeropuerto y dump na Parkietenbos. Poco poco tur e mangelnan ey ta desapareciendo, pasobra cada vez ta duna mas compania permiso pa roza mangel pa establece negoshi. Den un maneho sano lo por a supone cu aki aya ta duna permiso, pero por lo demas ta mantene naturaleza manera e ta, pasobra esey ta e atraccion, tambe turistico, cu e area tin. Awor nos por anticipa cu djis aki tin un costa pelon eynan, cu uno banda di otro negoshi di cuminda, cu ta purba di ta atractivo den un mondi di construccion riba y canto di awa; esey nos kier? E pregunta aki realmente ta mal haci pasobra no ta trata di loke nos ta desea, sino di loke e mandatario actual ta desea, loke lo keda secreto tambe pasobra nos no ta mira un fin na e actitud di soberbia, cu ta nan mes lo dicidi kico ta pa nos haya sa y kico nan ta conserva como maneho secreto. Pero, di tur manera, nos no ta depende so di por wak den cabez di ningun mandatario; loke si nos por mira ta loke nan ta haci. Y loke ta haci por ta hasta completamente contrario na loke ta pone riba papel.

Nos ta sigui bay mas pariba banda di costa. Aruba ta dispone – ainda – di un reserva forestal di mangel unico na Pos Chikito. E maneho apropia pa esaki, segun nos opinion, ta e prohibicion completo di actividad economico den e area aki. Tin suficiente posibilidad na otro lugar pa actividad economico. Cu e maneho mancaron na e area di Isla di Oro a cuminza sesenta aña pasa no ta motibo pa no corta awor y salba loke tin ainda.

Como e mas reciente capitulo aki ta bin e iniciativanan pa ‘desaroya’ e area pariba di Baby Beach conoci como Santana di Cacho, como area turistico. Cu e argumento cu ta trata aki di un situacion malo di higiena, ta boga pa esaki bira espacio di diversion turistico, cu logicamente lo beneficia e hotel(nan) proyecta riba e halto di Sero Colorado. No kere cu ta solamente esun bao construccion ta proyecta eynan, tin sigur cuatro lote mas destina na desaroyo hotelero. Esey ta haci mas comprensible tambe cu ta bin iniciativa pa redesaroya e area na costa, pasobra bo mester tin caminda di pone hende na beach, berdad? No, tur hende cu a yega di dedica cinco minuut na analiza e coriente di lama na Santana di Cacho por sa cu e coriente di lama eynan ta sumamente peligroso pa uso di cliente di un balneario normal. Claro cu bon buceador por drenta awa na e lugar, pero un turista comun y coriente? Nos ta lubida cu na e boca di Baby Beach mes regularmente tin caso di hogamento ora un landador sin experiencia sali di e boca ey? Nos por comprende cu tin hende cu ta pensa cu ‘the sky is the limit’; esey den hopi asunto por ta corecto, pero aki ‘aplica sano huicio’ lo ta un mihor lema.

Nos tin miedo si cu, ora hende cuminza propaga e idea, dia bieu den scuridad di e ‘backroomnan’ di gobierno ya a dicidi caba cu ta bay haci exactamente esey. Dia a dicidi cu e area di Sero Colorado ta apto pa 2500 camber, lo a pensa tambe pa con acomoda 5000 hende na beach: ayo Rogers Beach, ayo Baby Beach, y ayo Santana di Cacho pa e persona local mes. Nos ta keda cu Boca Mahos, talvez…?