Resultadonan preliminar di eleccion parlamentario di 22 di november na Hulanda a duna un sorpresa, den e promer ‘exit poll’ despues cu urnanan a cera pa 9:00 or di anochi. Aunke tabata anticipa un resultado fuerte pa e partido derechista PVV, e probable aumento di 18 asiento ta pone e partido aki claramente na cabez como partido mas grandi cu 35 asiento.
Di otro banda, e coalicion progresista di GroenLinks/PvdA a logra e siguiente avance grandi, cu ta di 8 asiento, poniendo nan na di dos lugar cu 25 asiento. E partido nobo Nieuw Sociaal Contract (NSC), di ex-politico di CDA, Pieter Omtzigt, ta bira e di cuatro partido mas grandi cu 20 asiento.
Di otro banda, e partidonan cu tabata den e ultimo gobierno di coalicion, actualmente demisionario, tur a perde. VVD cu tabata e partido mas grandi, probablemente ta cay back te na 24, perdiendo 10 asiento, y manteniendo un posicion ainda di e tercer partido mas grandi. D’66 ta perde 14 asiento pa keda cu solamente 10, mientras CDA a keda limita na solamente 5 asiento, perdiendo 10 tambe. Esaki ta menos cu e partido nobo BoerBurgerBeweging (BBB), cu ta inicia cu 7 asiento.
Parlamento Hulandes den Tweede Kamer ta conta cu 150 asiento. Manera semper, ta necesario pa forma gobierno di coalicion, loke nunca ta resulta facil, pa e divisionnan ideologico bastante fuerte. Por observa cu na banda conservador tin cambio grandi a tuma lugar, cu e ultra-conservador PVV como partido mas grandi, loke ta haci cu den inicio di negociacion lo no por ignora e partido aki. Sin embargo, lo ta mas probable cu e demas partidonan importante no lo bay coopera cu PVV, pa nan ideanan extremista encuanto stranhero y Islam. Di otro banda, e crecemento grandi aki di PVV ta un indicacion di e insatisfaccion cu tin cu tanto entrada di refugiado y hende cu ta busca un mihor bida, cu por ehemplo acceso na vivienda a bira un problema grandi pa e propio ciudadano Hulandes.
Si partidonan ta busca un opcion lagando PVV un banda, anto ta premira un proceso ainda hopi dificil pasobra VVD, cu no tin tanto animo pa goberna cu e bloque izquierdista di GroenLinks/PvdA, lo tin un problema pa yega na e mayoria parlamentario necesario.
Consecuencia pa Aruba
Tur esaki por conduci na un proceso bastante largo di formacion di gobierno, loke tin su influencia tambe pa e relacion entre Hulanda y Aruba. En principio e gabinete demisionario ta encarga cu atende e asuntonan pendiente cu gobierno di Aruba, ya cu esakinan a keda marca como ‘asunto no controversial’, loke ta significa cu e gabinete demisionario por sigui maneha esaki. E punto mas importante ta e acuerdo cu mester tin pa haci e cambionan necesario den e ley di supervision financiero di Aruba (Laft), cual mester percura pa un cuadro legal valido entrante 1 di januari 2024. E otro asunto riba cual mester bin claridad ta un eventual consenso tocante e ley di supervision di Reino, inclusive e discusion di e propuesta di gobierno di Aruba pa un modelo ‘hibrido’, unda lo tin tanto un ley local como uno di Reino, cu reparticion di tarea. Si no tin un resultado pronto riba e ultimo punto aki, por ta cu e ta keda pa e siguiente gabinete.
Den caso di un formacion di un gabinete mas conservador, cu participacion di PVV, por tin un cambio den direccion di un actitud menos tolerante cu e posicion di gobierno di Aruba, ya cu e partido aki no tin problema pa exigi e tema di independencia pa e islanan. Esey no ta posible si e islanan mes no ta desea esey, pero e por percura pa un tono menos faborable den e relacion cu Aruba y e demas islanan.
