Era Chavista ta parce di yega na su fin
Dia 7 di December Venezuela completo a manece literalmente cu un futuro completamente distinto, compara cu ora solo a baha e dia anterior.
Pasa di mey anochi na Aruba, presidente di Consejo Nacional Electoral, Tibisay Lucena, a duna di conoce e prome boletin oficial cu resultado irreversibel di e eleccion pa Asamblea Nacional, cu 96.03% di e actanan transmiti. A anuncia cu 74.25% di e posibel votadonan, registra den e Registro Electoral, a haci uzo di nan derecho di voto.
Partido Socialista Unido de Venezuela (PSUV), e partido di presidente Nicolas Maduro a haya en total 46 asiento den Asamblea Nacional. E coalicion opositor Mesa de la Unidad Democrática (MUD) a logra un total di 99 asiento di 145 asigna den parlamento, mientras cu a keda pa fiha ainda e resto di 22 asientonan, pa completa e total di 167 asiento. Ya caba MUD ta conta cu un mayoria simpel, cual ta 84 asiento. Ta posibel cu MUD lo yega na un mayoria cualifica, ora cu tur acta keda procesa y conoce 100% di e resultado. Un total di 100 voto pa un mayoria cualifica di 3/5 cu mester pa cierto procedemento, ta practicamente alcansa caba. Pa esun di 2/3 parti lo mester por conta cu 111 asiento, loke despues di reparti e resto di asientonan tambe lo por ta alcansabel pa MUD.
E mayoria cualifica di 2/3 ta hopi importante, pasobra esey ta duna e posibilidad pa reforma constitucion, y remove magistrado di e Tribunal Superior, entre otro facultad. Loke e Chavistanan no por a premira ta cu , despues cu nan a uza nan mayoria cualifica den pasado recien pa cambia constitucion di e republica, awor nan contrincante ta den e mesun situacion ey y lo bay haci uzo di esey sigur.
Despues di conoce e resultado adverso aki pa e partido Chavista, presidente Nicolas Maduro a drenta den cadena nacional pa dirigi palabra na e nacion. Si acaso tabatin duda cu Maduro lo a reconoce e resultado, en todo caso el a haci esey inmediatamente reconociendo victoria di su contrincantenan y a expresa su respet pa constitucion, cu a keda modifica pa e Chavistanan mes na momento cu nan mes tabatin e mayoria amplio den Asamblea pa por haci’e. Asina el a pone un fin inmediato na tur e speculacionnan cu por tabatin encuanto su reconocimento si of no di e resultado electoral. Maduro a culpa e guera economico cu su contrincantenan a hiba den su contra pa e cambio di apoyo substancial te na e minoria, ainda considerabel, cu ta sigui apoya e partido socialista. Tambe el a comenta positivamente riba e sistema digitalisa cu a funciona berdad hopi bon, con tal cu di ningun banda tabatin duda riba e resultado computa.
Awor, cu un bista totalmente nobo riba futuro di e pais, ta surgi e preguntanan con lo bay goberna. Mientras no ta facil pa reuni mayoria di e forsa politico pa bringa un enemigo comun, mucho mas dificil lo ta pa mantene unidad y goberna cu sabiduria, memey di tur e problemanan enorme cu e partido Chavista ta bay laga atras. Lo no ta facil awor cu e enemigo comun a keda derota, pa bay busca pa satisface opinion y deseo di mas di binti partido, tur hopi diferente den orientacion politico y den tamaño di nan base social. Loke en todo caso lo a cambia di biaha ta e pesimismo den economia, relaciona cu e peligro constante di e posibilidad di expropiacion di un empresa, si su maneho no tabata di agrado di e regimen socialista. Cu esey e problemanan urgente di escasez di divisa y desabastecimento no a bira menos, pero por spera un cambio den e rumbo cu e pais tabata aden, manteni bao di presidente Maduro.
Tambe pa e presonan politico, manera Leopoldo Lopez y varios otro, nan perspectiva a cambia di nochi pa mainta. Naturalmente cu nan eventual liberacion lo mester cana e caminda legal corecto, pero e speransa cu pronto nan por laga e pesadiya nan tras ta grandi.
Pa Aruba, como bisiña hopi cerca di e pais den euforia total, nos por ta contento cu dos aspecto importante: nos no lo haya un exodo di ciudadano Venezolano cu ta huy di nan mes pais pa busca un miho futuro otro caminda, manera tabata e temor pa basta tempo; y nos por a presencia di cerca con un conflicto politico hopi grave no a termina den lucha arma, manera a pasa tanto biaha den historia di America Latino. Dia 6 di december 2015 tabata un dia grandi pa Venezuela, pero ta sirbi tambe como ehemplo pa henter e continente, cu aunke con dificil e situacion ta, speransa pa un miho mañan semper mester ta posibel.
