(Reuters) – Un grupo cu ta representa victimanan di abuso infantil na Argentina ta pidi na Papa Francisco pa invita nan na Vaticano pa por scucha nan pedido.
Scandalnan di abuso sexual y scondemento durante decadanan a sacudi casi 1.380 miyon miembro di Iglesia Catolico, loke ta debilita su autoridad moral y ta pasa factura na su fiel siguidonan.
“Nos a mand’e un carta, nos ta habri pa dialogo y pa un reunion, pero den 10 aña nan no a tene e gesto publico di invita nos”, Sebastian Cuattromo a bisa diahuebs ultimo.
Oficina di prensa di Vaticano no a contesta di biaha na un pedido di comentarionan.
Papa Francisco, cu ta di Argentina tambe, ta conmemora e aniversario number 10 di su eleccion dia 13 di maart como Papa y a priminti un accion “irevocabel” contra e abuso den e clero. Tambe a reconoce e foutnan riba e tema, specialmente despues di e biahe pa Chile na 2018, den cual inicialmente a defende un pastoor acusa di a comete delitonan sexual contra muchanan menor di edad.
Cuattromo, ken a wordo abusa sexualmente pa un pastoor ora e tabata asisti na un scol catolico na Buenos Aires, a biaha pa Roma cu e co-fundado di e grupo “Adultos por los derechos de la Infancia,” cu speransa di por reuni cu e Papa.
El a afirma cu e ta sinti su mes decepciona pa e actitud general di Iglesia Catolico Argentino.
Cuattromo a denuncia e abusado di su scol, hunto cu otro victima. Segun Bishopaccountability.org, un website cu ta monitoria e casonan di abuso sexual di Iglesia, nan a ricibi 40.000 dollar cada un como forma di compensacion a cambio di nan silencio.
Na 2022 a cambia di opinion y a denuncia e pastoor na autoridadnan civil, loke a hiba na un condena di 12 aña di prizon.
