Polis na Inglatera y Wales ta distribuyendo formulario di permiso, urgiendo victimanan di abuso sexual y otro crimen pa entrega acceso na celular y otro aparatonan electronico, of core riesgo cu nan caso no ta wordo procesa.
E Conseho Nacional di Hefe di Polis a bisa ayera cu polis lo busca acceso na data di celular unicamente ora ta necesario pa proposito investigativo, pero e politica nobo ya caba a causa controversia.
E ta nifica cu victima di violacion y otro crimen, cu bay di acuerdo pa duna acceso na nan celular, laptop, smartwatch y otro aparato, lo haci nan email, mensahe di texto, y potret disponibel na autoridadnan.
E formulario ta adverti cu retene acceso lo por causa cu casonan no wordo procesa.
“Si bo nenga permiso pa polis investiga, of pa fiscal revela material cu lo permiti e acusado tin un huicio husto, e ora ey no lo ta posibel pa e investigacion continua” e formulario ta bisa.
E uzo di e formulario di permiso lo por enfrenta un reto legal di sikiera dos victima di violacion, segun e Centro pa Husticia pa Hende Muhe a bisa ayera. E firma legal a bisa cu e victimanan a wordo bisa pa polis cu nan caso probablemente lo collapse si nan no entrega data personal.
E grupo a bisa den un declaracion cu e politica nobo ‘claramente tin un efecto disuasorio riba e reportahe di acusacion di violacion’. Griff Ferris, consehero di politica na Big Brother Watch, a bisa cu e politica ta viola e derechonan di e victimanan y ta somete nan na un ‘strip search digital’.
E hefenan di polis a tweet cu ‘oficialnan lo pidi acceso na data priva unicamente ora ta necesario y proporcional, y lo duna conseho pa victimanan por haci un decision informa’.
Polis a bisa cu lo tin regla riguroso pa evita mal uzo di e informacion na corte.
James Slack, vocero di prome minister Theresa May, a bisa cu polis ta compronde cu e uzo di data personal den investigacion criminal ta ‘un fuente di ansiedad’. El a bisa cu polis lo balansa respet pa privacidad cu e necesidad di busca ‘tur linea rasonabel di investigacion’.
A introduci e formularionan despues di cu varios caso reciente di abuso sexual a collapse ora evidencia crucial a aparece for di celular.
E caridad independiente, Victim Support, a bisa den un declaracion cu duna polis acceso na tur informacion personal den un celular ta ‘hopi probabel’ cu lo causa ansiedad na e victimanan, y nan lo dicidi di no contact autoridadnan.
“Nos sa cu violacion y abuso sexual ya caba ta altamente poco reporta”, e grupo a bisa. “Mayoria di caso di abuso sexual y violacion ta cometi pa un hende conoci pa e victima, pues si nan ta den contacto cu e atacante, nan lo preocupa cu nan keho no lo ser tuma na serio, y lo ta menos probabel di entrega un keho.”
