Presidente di Venezuela, Nicolas Maduro a nombra diarason cu a pasa Tareck El Aissami como vice-presidente nobo. E director di relacion internacional di Centro Simon Wiesenthal, Shimon Samuels a bisa cu “ e vice-presidente Tareck El Aissami ta vincula estrechamente cu doctrina Chiita, cu organisacion terorista Hezbollah y cu famia di presidente Sirio, Bashar Al Assad, pasobra segun rumor El Aissami tabata anfitrion di Al Assad na Caracas, Venezuela.
E Centro Simon Wiesenthal a denuncia cu El Aissami ta un intermediario entre Iran y Argentina pa e desaroyo di e plan, cu ta busca sconde e culpa como complice di banda di Teheran den e atentado cu a pasa na 1994, contra edificio di AMIA, un asociacion mutual di Israel na Buenos Aires, Argentina. Den e atentado aki a muri mas di 85 hende.
“E nombramento di El Aissami como vice-presidente di Venezuela ta duna e posibilidad na Iran pa continua cu violencia terorista den henter Latino America”, comunicado di Centro Simon Wiesenthal a bisa.
Ariel Gelblung, ken ta representante na Latino America pa e Centro, a anuncia cu El Aissami ta relaciona cu narcotrafico y e grupo di Forsa Arma Revolucionario di Colombia, FARC. “El Aissami a hereda e odio cu e ex-presidente Chavez tabata sinti contra Israel y e pueblo hudiu, y cu awo por continua cu e antisemitismo di Maduro, cu ta menasa e poblacion hudiu cu ta biba na Venezuela”.
