(AP) – Vice Presidente Filipino Sara Duterte a bisa diasabra cu el a contrata un asesino pa mata e president, su casa y e vocero di Cas di Representante si su persona keda asesina, den un menasa publico cu el a adverti no ta un chiste.
Secretario Ehecutivo Lucas Bersamin a referi na e “menasa activo” contra President Ferdinand Marcos Jr. na un forsa di guardianan presidencial elite pa “accion apropia inmediatamente.” No a keda inmediatamente cla ki accionnan lo ser tuma contra e vice presidente.
Presidential Security Command a aumenta Marcos su seguridad y a bisa cu a considera e vice presidente su menasa, cual a ser haci “asina descaradamente den publico,” un problema di seguridad nacional.
E forsa di seguridad presidencial a bisa cu e ta “coordinando cu agencianan di ley pa detecta, evita y defende contra cualkier y tur mensa na e president y su famia.”
Duterte, un abogado, a purba retira su remarcanan bisando cu nan no tabata un menasa real sino un expresion di e preocupacion tocante un menasa contra su propio bida. “Dicon lo mi mat’e si no ta pa vengansa for di mi tumba? No tin motibo pa mi mat’e. Cua ta e beneficio p’ami?” Duterte a declara na reporteronan.
Bao codigo penal di Filipina, un remarca publico di e tipo aki por constitui un crimen di menasa of haci daño na un persona of su famia y ta castigabel cu un boet y condena den prizon. E constitucion di e pais ta bisa cu si un presidente fayece, keda permanentemente deshabilita, ta kita for di su funcion of renuncia, e vice presidente ta tuma e posicion y ta sigui e resto di e termino.
Marcos a campaña cu Duterte como su vice presidente den eleccionnan di mei den 2022 y ambos a gana cu victoria cla cu un campaña di unidad nacional. E dos lidernan y nan campo, rapidamente a cay den desacuerdo pa diferencianan clave, incluyendo e manera cu nan kier a lidia cu China su accionnan agresivo na South China Sea. Duterte a renuncia for di e Gabinete di Marcos den juni como secretario di educacion y hefe di un curpa anti-revolucionario.
Di mesun manera cu su tata, ex president Rodrigo Duterte, e vice presidente a bira un critico vocal di Marcos, su casa Liza Araneta-Marcos y e vocero di e Cas Martin Romualdez, e presidente su aliado y primo, acusando nan di corupcion, incompetencia y politicamente persigui e famia Duterte y su aliadonan cercano.
Su ultimo accionnan a ser causa pa un decision di miembronan di e Cas alia cu Romualde y Marcos pa detene su hefe di empleadonan, Zuleika Lopez, ken a ser acusa di mishi u un investigacion den congreso tocante e posibel mal uso di su presupuesto como vice presidente y secretario di educacion. Lopez despues a ser hiba hospital pa motibo cu el a bira malo y a yora ora el a tende di e plan pa temporariamente detene su persona na prizon di hende muhe.
