Freddy Guevara, vice-presidente d Asamblea Nacional, a solicita proteccion den embahada di Chile, despues di menasa di gobierno. E medida a ser acepta pa Chile.
Gobierno Chileno a informa cu e vice-presidente di parlamento Venezolano ta refugia desde diasabra pasa den residencia di embahador Chileno na Venezuela, despues di ricibi menasa cu por a afecta su integridad.
Tribunal Supremo di Husticia a habri caminda diabierna pasa pa enhuicia Guevara, declarando cu e presuntamente tabata envolvi den instigacion publico y otros delito, despues di cu a solicita pa kita su inmunidad parlamentario.
Comunidad internacional a expresa rechaso pa e medida di retira inmunidad parlamentario di Guevara, aplica pa Tribunal Supremo.
“E tipo di medida aki ta limita legalmente e ehercicio di funcion di e integrantenan di Asamblea Nacional, elegi pa voto popular, y ta desconoce e separacion di podernan, indispensable pa un democracia pleno y e respet pa e estado di derecho,” asina un comunicado firma pa Secretaria di Relacionnan Exterior di Mexico ta bisa.
Gobierno di Spaña a condena “e atentado nobo aki contra democracia Venezolano y contra su Asamblea Nacional, unico poder legislativo legitimo y depositario di soberania nacional di pueblo.”
E asina yama Grupo di Lima, conforma pa 12 pais di continente Americano, a sigura cu e decision di Tribunal Supremo “ta constitui un atentado nobo contra estado di derecho y e division di podernan na Venezuela y ta impedi e funcionamento normal di Asamblea Nacional, legitimamente constitui a traves di voto popular.”
Julio Borges, presidente di Asamblea Nacional (AN), a sigura ayera cu e medida di kita inmunidad parlamentario di e vice-presidente di Asamblea ta un decision politico y arbitrario cu ta pretende sigui debilita e parlamento.
E diputado pa estado Miranda a afirma cu e legisladornan lo sigui traha pa e Venezolanonan cu a vota na fabor di e mayoria opositor den e eleccion parlamentario di 6 di december 2015.
El a rechasa e accionnan tuma pa gobierno den ultimo dos aña contra poder legislativo. “Gobierno a trata di destrui Asamblea Nacional. 15 dia despues cu a oposicion a gana ya nan a kita tres diputado pa evita e mayoria califica di oposicion. Tribunal Supremo di Husticia ta dedica na resolve caso den cuestion di ora y e caso aki tin mas di un aña y no tin ningun resolucion,” e diputado a agrega.
