Informacion di fuente diplomatico ta indica cu dia 17 di mei venidero un delegacion diplomatico di Colombia encabesa pa Vice Minister di Relacion Exterior di Colombia, Sra. Patti Londoño Jaramillo lo realisa un bishita oficial na Aruba.

E lo ta un reunion cumbre di halto nivel diplomatico entre Colombia, Hulanda y Aruba. Vice minister Londoño Jaramillo lo bin compaña entre otro pa Gobernador di Guajira, Dr. Weilder Guerra kende ta un bon amigo di Aruba. Igualmente informacion compila pa e matutino aki ta indica cu embahador di Hulanda na Bogota y minister Hulandes pa Asunto di Reino tambe lo ta presente; ademas di nos autoridadnan local.

E bishita di e vice minister di Relacion Exterior di Colombia lo ta uno masha cortico di un dia so; despues e hunto cu su delegacion lo biaha na e isla bisiña di Corsou. E meta di e reunion cu nan lo sostene riba nos isla ta esun duna dinamica na e memorandum of understanding (MoU) cu Aruba y Colombia a firma mas cu un aña pasa. E acuerdo aki ta busca fortalece entre otro e aspecto comercial y cultural bilateral entre ambos paisnan y muy specialmente cu e departamento Colombiano di Guajira.

Bishita diplomatico
E fuente consulta pa Bon Dia Aruba a bisa cu nan lo busca “dinamisar e acuerdo di entendimento” firma entre Colombia y Aruba. Ta e prome biaha –despues di hopi aña- cu un reunion di e caliber diplomatico aki ta tuma luga entre e tres partnernan aki. Ainda nan ta trahando riba e agenda di topiconan cu nan lo bay atende durante nan reunion di mita di e luna aki.

Vice ministro di Relacion Exterior di Colombia, Patti Londoño Jaramillo ta politologo, internacionalista, docente y investigado di Facultad di Finansa, Gobierno y Relacion Internacional di Universidad Externado di Colombia.

E ta co-autor di e buki tocante Nacionnan Uni y Movemento di Paisnan No Alinea. El a skirbi e buki aki hunto cu ex Canciyer Colombiano, Sr. Luis Fernando Jaramillo. El a realisa estudio di specialisacion y post grado na Suisa, Suecia y Spaña.

Di su banda, Gobernador actual di Guajira cu no ta politico sino cu e ta un cientifico y antropologo nombra recientemente pa presidente di Colombia. E tin un confiansa grandi cu e acercamento entre su region y Aruba, pero tambe cu Corsou y Bonaire, lo yuda habri nan frontera pa stimula nan desaroyo economico.

Esaki lo ta e prome biahe exploratorio di apertura pa nos region cu Sr. Guerra ta realisa como Gobernador di Guajira. Ya den pasado el a bishita nos isla como investigado Antropologo caminda e tin bon relacion cu Museo Arkeologico Arubano (MAA) unda el a yega di presenta su ultimo buki “El Mar Cimaron”

E biaha aki compaña cu vice minister sra. Londoño Jaramillo, como Gobernador Dr. Guerra lo kier tuma contacto cu diferente sector entre nan academico, cultural, comercial, salud y turismo pa explora e posibilidad di fortalece nan relacion.