Pa un comunidad mayoria Catolico, celebracion di Santa Misa cu asistencia di nan parokianonan, ta un señal cla cu nos ta bayendo na e normalidad bek of loke ta wordo yama e normal nobo.

Diabierna ultimo minister Dangui Oduber a anuncia cu celebracion di Santa Misa a cay tambe den e actividadnan permisibel den e nivel 2 di flexibilidad di e medidanan cu a wordo adopta for di dia 13 maart ultimo pa contraresta e contagio di e Coronavirus/Covid-19 riba nos isla.

Vicario di Aruba, pastoor Andrzej Makowiec a bisa cu como Polaco e ta contento cu e celebracion di Santa Misa a cuminsa tuma luga bek riba e mesun dia cu mundo Catolico ta recorda e natalicio 100 di Santo Papa Juan Pablo II. “Pa nos cu ta Polaco e dia di awe ta sumamente importante,” el a bisa ayera.

Tur misa a cuminsa oficialmente ayera cu nan celebracion religioso, pero no tur ta cuminsa pareu. Tin algun misa cu nan ta celebra Santa Eucaristia awe of den transcurso di siman. E ta haya cu esaki ta un momento pa gradici Dios cu despues di casi dos luna e momento a yega pa misa habri.

Segun pastoor Andrzej ta importante cu den e momentonan dificil aki pa nos busca Dios. Como Catolico Cristian ta importante pa fortalece nos fe, compartiendo den comunidad cu otro, manteniendo e distancia fisico. Tambe teniendo cuenta cu e necesidad di otro, ya cu tin cantidad di hende den necesidad.

Igualmente pastoor Andrzej a referi na importancia di ricibi sacramento di Eucaristia y confesion, etc… E ultimo tempo a wordo comparti comunion spiritual pasobra no tabatin oportunidad pa comunion sacramental.

 

Pero e echo cu misa a habri bek ta demanda un responsabilidad di tur parokiano, ya cu nos ta bibando un momento sumamente dificil. “Nos mester wak na prome luga nos salud y salud tambe di otro hende,” el a bisa.

E religioso a declara na Bon Dia Aruba cu diabierna ultimo nan tabatin un reunion cu sacerdotenan pa palabra e detayenan pa habri misa bek. Tambe nan mester di un decreto di Obispado pa habri misa bek cu tambe a yega diadomingo.

El a bisa cu exigencia pa habri misa ta minimal. Pero semper teniendo cuenta cu tur regla di higiena y distanciamento social. No tin exigencia pa bisti mask, pero esunnan cu kier bisti’e ta liber di haci’e.

E hendenan cu no ta sinti su curpa bon y ta presenta algun di e sintomanan relaciona cu Covid-19, abstene di participa na e Santa Misa. Nan por sigui e misa cu ta wordo transmiti via e medionan di comunicacion.

Capacidad di misa

Nan a cuminsa prepara e misanan caminda e bankinan ta marca unda e parokianonan por sinta. El a laga sa cu famia por sinta hunto. Tambe nan ta tene cuenta ora cu ta traha di un pareha cu yiu. Muchanan por asisti misa y nan tin pensa pa bin cu un misa special pa mucha so, manteniendo e distancia social.

E bankinan di e misa lo ta marca pa percura cu mas hende por atende e misa, pero teniendo cuenta cu e distanciamento di 1.5 meter. E misa lo tin hand sanitizer tanto pa entrada y tambe salida di e parokianonan. Tambe lo tin limpiesa regular di e misa.

Si tin dia cu e cantidad di parokiano ta grandi compara cu e capacidad di carga di e misa, no tur por drenta. Esaki lo por presenta un dia den siman por ta diadomingo cu generalmente tin mas participacion di parokianonan.

E ora ey nan mester por participa di e misa den transcurso di e siman. “Tur cos ta depende di e tamaño di e misa,” pastoor Andrzej a bisa. Den e misa tin luga marca. Si por ehempel e misa por carga maximo 60 of 80 persona, solamente e cantidad aki por drenta.

Tin misa cu a opta pa registra por ehempel esun di Brasil. Pero e registracion cu lo por tene luga no solamente pa tene un bista di parokiano cu lo bin na e misa, pero tambe pa hiba un control den caso cu ta presenta un contagio.

Teniendo na cuenta e misa su grandura tin algun parokia cu lo bin cu misa extra, ya cu e capacidad ta mas limita cu otro. Na Playa, a pesar cu Pro Catedral San Francisco ta grandi, nan lo celebra cinco misa riba diadomingo.

E aumento di celebracion di misa lo crea oportunidad pa hendenan por participa di dje. Igualmente el a bisa cu den e parti di sacristia, nan lo percura pa eynan solamente ta presente esun cu ta urgente, pa evita aglomeracion.

Orario y comunion

Tin misa cu lo keda cu orario normal di antes. Igualmente lo keda algun transmision di e misa pa esun cu no por participa por haci’e via media di comunicacion.

Pa loke ta ricibimento di Santa Comunion, nan ta sigui loke Obispado a decreta na maart ultimo pa ricibi e sacramento aki no na boca sino riba man. Pero esaki no ta kita cu cada parokica ta bin cu nan propio forma pa duna comunion. Ya sea cu e parokiano ta bin dilanti manteniendo e distancia. Of mas tanto nan ta sinta na punta di banki pa pastoor of su ayudante pa parti comunion cerca nan.

El a recorda e decreto di obispado pa loke ta uzo di awa bendita, señal di paz, comunion, etc… Pastoor Andrzej a remarca cu tur esey a keda vigente. No tin awa bendita na entrada y no ta duna man ora di paz.