“Discurso di odio” di Nick Cannon y su teorianan anti-Semita a conduci na ViacomCBS pa corta lasonan cu e productor y anfitrion di television, segun e gigante di medionan di comunicacion.
“ViacomCBS ta condena intolerancia di cualkier forma y categoricamente nos ta denuncia tur forma di anti-Semitismo”, e compania a bisa den un declaracion diamars. Ta terminando su relacion cu Cannon, ViacomCBS a bisa.
E movida di e compania tabata den respuesta na comentarionan cu Cannon a haci riba un podcast, den cual e y Richard ‘Professor Griff’ Griffith, ex- miembro di Public Enemy, a discuti prehuicio racial. A graba e podcast na mei 2019 y a publica esaki dia 30 di juni.
“Nos a papia cu Nick Cannon tocante un episodio di su podcast ‘Cannon’s Class’ riba YouTube, cual a promove lenguahe di odio y teorianan di conspiracion anti-Semita”, ViacomCBS a bisa. “Mientras nos ta apoya educacion y dialogo continuo den e lucha contra intolerancia, nos ta profundamente perturba cu Nick no a reconoce of pidi disculpa pa perpetua anti-Semitismo, y nos ta terminando nos relacion cune”, e compania a bisa.
Cannon a produci ‘Wild ‘n Out’, un serie di comedia improvisa pa VH1, un canal di cable propiedad di ViacomCBS. E tabata un parti regular di show di television no conecta na e compania, incluyendo como ex- anfitrion di NBC ‘America’s Got Talent’ y anfitrion di Fox ‘The Masked Singer’.
El a skirbi un post largo riba Facebook ayera, bisando cu e tabata ‘profundamente tristo’ pa su despido, y a acusa e compania di usa su comentarionan pa purba di silencia ‘un homber color scur cu ta papia hopi’. “Mi no lo wordo ter, silencia, of continuamente oprimi door di ningun organisacion, grupo of corporacion”, Cannon a bisa, agregando cu e tabata buscando propiedad total di ‘Wild ‘n Out’.
“Racismo sistemico ta riba locual a construi e mundo aki y tabata e tema cu mi tabata intentando di resalta den e clipnan recien cu a circula di mi podcast”, Cannon a bisa. “Si mi a duna impulso na lenguahe di odio, mi ta pidi disculpa for di fondo di mi curason.”
Sinembargo, e tambe a exigi un disculpa di ViacomCBS, un compania cu cual el a nota di a traha cune pa mas di 20 aña.
Den e podcast di mas di un ora, Cannon y Griffin ta bisa cu hende color scur ta e berdadero Hebreonan, y cu Hudiunan a usurpa nan identidad. Cannon despues ta bay den un discusion di color di cuerto – “Y mi ta bay bisa esaki cu cuidou”, e ta cuminsa – pa bisa cu hende cu no tin suficiente melanin ta ‘un tiki menos’.
Esunnan sin cuero color scur tin un ‘deficiencia’ cu historicamente a forsa nan pa actua for di miedo y comete actonan di violencia pa sobrevivi, el a bisa. “Nan mester tabata salvahe”, Cannon a bisa, agregando cu e tabata referiendo na ‘hende Hudiu, hende blanco, Europeo”, entre otro.
Accion di ViacomCBS a yega mientras Kareem Abdul-Jabbar, e grandi di basketball y escritor, a condena varios celebridad di deporte y entretenimento pa tweet y post anti-Semita, y pa locual el a yama un ‘falta di indignacion shockeante’ como respuesta.
Abdul-Jabbar a haci su comentarionan den un columna pa The Hollywood Reporter cu no a referi na Cannon.
Mientras controversia pa su remarcanan a cuminsa crece dialuna, Cannon a contesta den un post riba Facebook: “Mi no ta apoya lenguahe di odio ni transmision di retorica odioso… Comunidadnan color scur y Hudiu ambos a enfrenta odio enorme, opresion, persecucion y prehuicio pa miles di aña y den hopi manera tabata y lo sigui traha hunto pa sobrepasa e obstaculonan aki”, el a skirbi. Den e post largo, Cannon tambe a bisa cu e ta haya bon pa ser teni responsabel pa su declaracion, y cu e ta tene su mes responsabel ‘pa e momento aki y ta tuma completo responsabilidad’.
