Durante luna di mei restonan di turtuga a ser encontra na diferente sitio manera Boca Grandi, Fisherman’s Hut, Rooi Kochi en Sabana Blanco. Mayoria di e restonan encontra ta di Hawksbill seaturtle (Eretmochelys imbricate) y Green turtle (Chelonia mydas) y e restonan mayoria tawata indica un morto no natural y ilegal.
Turtuga ta wordo considera un bestia proteha segun nos “Natuurbeschermingsverordening” e turtuga tambe ta wordo proteha pa e convenio Internacional di CITES. Cumpliendo cu nan tarea y autoridad den maneho di e ley di CITES, Veterinaire dienst seccion di Departamento di Salud Publico hunto cu Turtuga Aruba kier un bez mas recorda comunidad cu ta contra ley pa gara, mata, bende y consumi carni di turtuga.
Veterinaire diest hunto cu Turtuga Aruba ta haci un suplica na comunidad di Aruba pa sigui raporta casonan unda turtuga ta wordo gara, mata of bendi na polis. Es (nan) cu wordo gara ta haci e practicanan aki, por wordo persigui penalmente.
E sorto di turtuganan aki ta pertenece den nos awanan teritorial y nan ta hunga un rol hopi importante den mantene e bida marino den balans. Banda di esaki e beachnan di Aruba ta unda e turtuganan aki ta pone nan webonan cada 2 pa 5 aña na e mes un caminda cu nan mes a nace. Un averahe di 1 riba 1000 turtuga cu nace ta keda bibo y ta logra yega madurez pa por completa su ciclo di bida. Esaki ta e motibo pakico tur Turtuga ta wordo proteha pa ley.
Si bo persona kier haya sa mas tocante Turtuga, bo por tuma contacto cu Turtuga Aruba na (turtugaruba@hotmail.com) y si ta desea por hasta inscribi como boluntario. Mas boluntario nos tin mas nos comparti informacion na comunidad y haci e posibilidad cu turtuganan ta biba mas un realidad. Asina nos por sigui presencia nan nacemento riba beachnan di nos dushi Aruba.
