Den contacto cu Veterinaire Dienst, nos redaccion a ricibi informacion cu e cantidad di bestia morto pa via di e derame di azeta na nos costanan ta hopi abao te ainda. Aunke cu a duna indicacion cu esaki ta hopi abou, nan no kier a duna cifra. Te na e momento aki a haya un parha cu a sobrevivi y ta bezig ta “force feed” e pa e haya forsa pa despues nan lag’e bay.
Riba Facebook mes nos redaccion a tuma nota di dos caso caba caminda cu a haya parha morto pa via di e derame. Veterinaire Dienst tin un rol hunto cu diferente NGO’s y Parke na momento cu haya un bestia contamina cu azeta ocasiona door di derame den nos costanan, segun Riem van den Berg ta informa Bon Dia.
Inzetplan
Segun Rampenbureau, tin un ‘inzetplan’ cual ta bisa bo ken ta responsabel pa kico. Rampenbureau ta lidera esaki, e ‘haven meester’ cu ta e coordinador, DOW cu ta ‘response agent’ y riba dje a hinca Parke cu Aruba Birdlife cu ta encarga cu e parti di fauna. Nan a acerca Veterinaire Dienst bao di DVG, hunto cu Santa Rosa pa setup un luga pa mantene/recupera y haci e parhanan limpi. Hotelnan tambe ta dunando cooperacion cu serbetenan.
“Tin hopi cos structura cu no ta bin den publicidad pero nos ta operacional y nos tin expertonan cu a bin conseha nos anto aplaudi nos forma di trata cu e situacion,” director interino di Rampenbureau Rino Hermans ta splica nos. E ta laga sa tambe cu di Aruba bay afo cu e centro di coordinacion na Corsou, Rampenbureau ta comunica tur dia pa haya updates y plan di maneho na con nan ta trata cu ne.
Cifranan di gasto
Ainda e cifranan ta hopi global segun sr. Hermans. Despues di e proces-verbaal cu Rampenbureau mester traha, lo tin un bista exacto riba cifranan di gasto riba material y trabao. Parke su natural pool ta cera pa publico y eynan ta perdida pa entrada caba. Hermans: “Aruba tin un plan y nos ta draai e plan. Tur hende ta haciendo kico nan tin cu haci conforme e plan aki tambe. Cu nos tin cu adapt’e aworaki, si. Pasobra e plan tabata mas pa un ‘oil spil vlek’ y no ‘tarballs’. Pues aworaki lo pone un appendix di ‘tarballs’ cu hopi biaha lo bira e mesun operacion akinan. Lag’e subi anochi,den dia haci e limpi.”
Plan di accion
E plan di accion pa atende cu derame di azeta na nos costanan ta skirbi desde 1993 y a wordo revisa den 2016. “E ta uitgeschreven pero no vastgelegd ainda den ministerraad pasobra tin un par di detaye pa caba cu ne. Tur e departamentonan cu ta operando aworaki sa kico ta nan rol,” sr. Hermans ta bisa.
Veterinaire Dienst ta registra e bestianan pa analisa con grandi e daño ta. Nan tin nan adresnan den e grupo caminda cu ta trata e bestianan si nan ta bibo ainda. Greg Peterson di Aruba Birdlife Conservation tambe ta confirma cu e parha cu a sobrevivi ta cerca dr. Gogorza kende ta un experto den e ramo aki anto e parha ta den bon condicion. Bon Dia Aruba lo keda pendiente cu Aruba Birdlife y Veterinaire Dienst pa locual ta datonan cu nan mes ainda ta den e proceso colectando; e.o. cuanto parha a wordo afecta etc.
