Siman pasa a fayece na Aruba un heroe y militar veterano di e Guera di Korea (1950-53), kende tabata dispuesto di sacrifica su bida na defensa di democracia y libertad di mundo. Ta trata di e ciudadano Colombiano, Jorge Héctor Gómez Vargas kende tabatin 18 aña residencia na Aruba.
Sr. Gómez tabata un Sargento Mayor di e Batayon Colombia y un di e poco heroenan di e episodio aki cu ainda tabata na bida. E tabata un protagonista di e conflicto arma aki cu a dura casi tres aña entre Nort Korea (regimen comunista) y Sur Korea (democratico).
Sr. Jorge Héctor Gómez Vargas tabatin 89 aña y na luna di april e tabata cla pa celebra su 90 aña. Pero siman pasa el a fayece y awe pa 2’or atardi su restonan mortal lo ta na cas funerario Aurora, unda Consul di Colombia, sra. Mirza Gnecco lo haci acto di presencia pa duna honor no solamente na un heroe militar Colombiano, sino un heroe di humanidad.
Guera Korea
E guera aki a sosode den cuadra di loke a wordo yama Guera Friu, entre Merca y ex Union Sovietico, unda varios pais a participa entre nan Colombia bou e paraplu di Organisacion di Nacionnan Uni (ONU). Un total di 15 pais di henter mundo y e unico pais Latino Americano, esta Colombia a uni na e conflicto aki.
Na aña 1950, Colombia a wordo yama dor di ONU pa colabora mandando trupanan pa e Guera di Korea, un pais situa na 5.000 kilometer di distancia fei di Colombia. E meta tabata specialmente pa sostene Sur Korea cu tabatin e ayudo incondicional di Merca. Durante su participacion di tres aña, Colombia a manda un batayon di 4750 soldaat. Fei di e Batayon Colombia 163 soldaat a muri, 448 a resulta herida, 47 soldaat a disparce y 28 a bira prizonero y despues a wordo libera.
Heroe di guera
Sr. Gómez Vargas a wordo ricibi varios reconocemento durante su casi 9 decada di existencia. Asociacion Colombiano di Veterano di Guera di Korea a duna testimonio cu sr. Gómez Vargas a participa den e conflicto arma aki bou identidad militar 10964 di e Segundo Batayon Colombia cu a wordo incorpora na e di shete division di Infanteria di Ehercito Mericano.
El a dedica 23 aña di su bida na servicio militar. E prome reconocimento cu el a ricibi ta data di dia 27 di juli 1953, practicamente ora cu e guera aki a caba. E reconocimento aki ta debi na su servicio militar den e Guera di Korea y otorga pa e nacionnan miembro di ONU. Tambe el a haya otro reconocimento “Strea di Brons” pa su participacion entre 1952-53 den e guera menciona dor di forsa militar di Colombia. Sr. Gómez Vargas kende a yega sirbi henter mundo como heroe di guera, tambe a sirbi su pais riba tereno diplomatico. Na Aruba e tabata bibando cerca su yiu muhe Elizabeth Noguera, y disfrutando di su pensioen bon mereci hunto cu su casa kendenan a celebra 60 aña di bida matrimonial.
Apesar di tur reconocimento otorga, e veterano di guera aki tabata un persona masha senciyo y humilde. E tabata un persona drechi cu masha respet y cumplido di su obligacion cu hopi disciplina. Pero e virtudnan aki tabata algo natural den dje cu e tabata refleha cu hopi amor. P’esey cada bes cu e tabata ricibi un reconocimento e prome sorprendi tabata e mes.
Sr. Gómez Vargas tabata un ehempel di bida. E tabata un ciudadano ehemplar semper dispuesto di sacrifica su mes na beneficio di otro. Un anecdota tabata cu den cuadro di e conflicto y e guera friu aki, presidente di Colombia, Laureano Gomez a bay realisa un bishita na Merca. Debi cu eventualmente e bida di e mandatario aki tabata na peliger, sr. Gómez Vargas a fungi como presidente di Colombia durante e caravana oficial pa protege su mandatario… Mientras cu e berdadero presidente a bay den otro auto coriendo riba otro caminda. “Mi a yega di bira presidente di Colombia pa tres ora”, asina cu alegria semper sr. Gómez Vargas tabata relata e episodio aki. Memey di su tristesa y cu hopi orguyo, su yiu muhe Elizabeth a declara na Bon Dia Aruba: “E hende a kere cu e tabata e presidente y no tabata asina… Mi tata tabata ta!”
.jpg "Philipine van Aanholt 26 luga prome dia Laser Radial Weganan Olimpico")
