Minister di Salud Dangui Oduber no tin mucho informacion di Vertical Designs Aruba y ta nenga cu a duna cualkier permiso pa cultiva cannabis. Esaki e Minister a informa e portal NoticiaCla.
Bon Dia Aruba a publica e informacion cu Affinor Growers Inc di Canada a firma un asina yama ‘binding letter of intent’ pa cumpra accionnan di Vertical Designs Aruba, VDA, pendiente licencia pa produci cannabis entre otro. VDA a keda estableci na 2018 y a duna di conoce cu ta bay haci uzo di tecnologianan di Affinor Growers pa produci fruta y berdura. Bon Dia Aruba a trata di haya informacion kico tur VDA a logra desde cu el a keda estableci.
Tambe Bon Dia Aruba a mustra cu e intencion pa produci cannabis, ta colga, pasobra ni e ley di Cannabis a pasa ainda. Sinembargo, esaki no a kita afo cu Affinor Growers, cu tin conexion cu VDA, a laga sa cu e compania Arubiano a haya no menos cu 100 acres, esta 40 hectarnan caba pa su actividadnan. E espacio aki ta encera mas di 400 mil meter cuadra, esta 400 kilometer cuadra pa asina por traha e torennan, cu cada uno ta rekeri 1000 meter cuadra pa produci berdura, fruta y cannabis.
Preguntanan na diferente instancia, for di Direccion pa Asuntonan Economico y Industria, DEHZI a keda sin haya contesta. Mescos ta traha preguntanan na Direccion di Infrastructura y Planificacion, con por ta cu VDA a logra haya un tereno asina grandi sin cu e ley di cannabis a pasa. E preguntanan unda e tereno ta ubica, si ta trata di huurgrond of otro no a haya contesta tampoco.
Den otro palabra Minister Oduber tin rason cu e no a duna ningun hende licencia, pasobra simplemente e ley no a pasa. Pero locual ta yamativo ta cu e Minister a bisa di no sa mucho di VDA, aunke cu tabata su propio colega Minister Demisionario Chris Romero di Sector Primario cu a papia ampliamente di e proyecto di Vertical Designs Aruba.
E propio relatonan di Vertical Designs, di cual VDA ta un subsidiario, y Affinor Growers ta ilustra si cu e liñanan den e companianan ta hopi cera. Affinor ta un compania publico cu ta bende accionnan. Y na momento cu un compania asina ta anuncia na mundo cu e tin intencion serio pa cumpra un compania na Aruba cu tin 400 mil meter cuadra di tereno pa produccion di berdura, fruta y cannabis, e ta un noticia cu merece contesta na Aruba, unda obviamente tin hopi pregunta cu a lanta. Den e propio relato di Affinor Growers ta bisa cu unabes cu traspasa e actividadnan di VDA pa Affinor, e compania Arubiano lo ricibi accionnan na balor di 1.5 miyon dollar, basa riba e prijs di accion di 0.03 cen. Ademas di un asina yama bonus di por lo menos 500 mil dollar Canades.
