For di ultimo tempo, Aruba ta bin conociendo un aumento pa loke ta trata uso vehiculonan electronico manera step of trike, cu te na e momentonan aki no tin ni un tipo di regulacion pa loke ta trata ley di trafico manera Vereniging Rijschool Aruba (VRA) a sigura.

Pa esaki, Tomas Ruiz, ken ta fungi como secretario di VRA y Wilfred Hart, ken ta un ex-polis hefe di trafico y awor ta pensionado, a sigura cu e tipo di vehiculonan manera esakinan mester tin un tipo di rijbewijs na unda tambe tin otro vehiculo door di foutnan den ley den definicion di vehiculo mes cu no tin rijbewijs p’e.

Por ehemplo, den definicion di un motorfiets e trikenan grandi cu tres wheel cu algun companianan ta huur ta bisa cu te cu 600 kilo por core riba caminda pero den rijbewijs esey no a cambia: “kiermen si e brommer aki ta pisa 450 of 500 kilo e ta cay bao e categoria di motorfiets y ora bo ta busca rijbewijs, no tin rijbewijs p’e, pasobra e no ta cay den rijbewijs di brommer y tampoco por bay den B pasobra no tin auto C, pero nan ta huur esaki na turistanan.”

Den dianan aki VRA ta bin treciendo dilanti den prensa cierto puntonan cu nan ta den combersacion pa por cambia den ley di trafico na unda nan ta puntra autoridadnan concerni: kico ta wardando pa regula esaki, ora tin un accidente cu morto?

Tambe ta bin observando riba caya e uso di step electrico na unda usuarionan mester tin un seguro pa haci uso di esaki den e caso si un accidente lo por sucede.

Anteriormente step tabata usa pa muchanan pero awor danki na tecnologia por mira cu adultonan ta haci uso di nan door cu nan ta electrico y nan por core distancianan un tiki mas largo na un velocidad di 30 kilometer pa ora, pero na momento cu a cuminsa traha esaki mester cuminsa regula e ley y un di e luganan cu a haci esaki ta Hulanda.

Hart a sigura cu ayanan a cuminsa coloca fietspad unda mester core te tanto kilometer pa ora y na Aruba ta existi e bebouwde kom cu ta maximo 50 kilometer pa ora, pero si ta sali for di e bebouwde kom e ta 80 kilometer pa ora. E ora ey no por laga un aparato ey bay core na Hulanda. Nan ta pa core na un caminda cu ta 50 kilometer pa ora pero den bebouwde so. Tambe tin cu mar’e na un hende cu tin 16 aña pa e sa ley di trafico. Tambe mester saca un permiso cu ta indica cu e persona aki a pasa un test, e tin cu bisti un helm y e aparato mester tin un plachi number chikito cu ta indica cu mester paga impuesto.

E ora ey mag di laga hende core cune pero si no a aregla un ley pa esaki, manera Hart ta señala, e ta bay bira un problema tanto pa turistanan y localnan cu tambe a cuminsa cumpra nan pa bay trabou, por ehemplo, “pero gobierno cu mester proteha e pueblo no ta haciendo nada cu esaki,” Hart a finalisa.