Vereniging Rijscholen Aruba ta continua duna charla den bario pa informa y scucha e poblacion

For di aña pasa, Vereniging Rijscholen Aruba ta bin treciendo dilanti nan preocupacionnan pa loke ta trata trafico den e poblacion, sin cu nan por haya oido di instancianan concerni. Ta p’esey cu nan a dicidi di bay na cada bario pa duna charla na comunidad, pa informa y scucha hendenan tocante cierto punto.

Den e charlanan nan ta papia tocante bastante disgusto cu tin riba con cierto automobilista ta core riba rotonde, pregunta riba seguro, asunto relativamente nobo manera auto y e bicicleta electrico, cu por produci candela y informacion valioso y preventivo cu e tipo di candela aki cu no por pag’e di un manera lihe.

Hende coriendo auto sin rijbewijs

Den noticia constantemente por lesa con chauffeurnan ta core auto sin rijbewijs, caminda VRA a sigura cu esey por ta debi na diferente factor, por ehemplo, hende ta considera cu prijs di rijbewijs ta mucho halto, nan ta bisa cu nan no tin mester di dje debi cu no tin mucho control di Polis, of e problema cu ta pasa den departamento.

Nan tin conocemento cu fraude a tuma luga den pasado ora un hende a cay cera; y no lo ta nada straño pa nan si esey por ta pasando aworaki. Pa e motibo ey nan ta purba di evita esey trahando conhuntamente cu e departamento, “pero ainda nos ta tende cu e co’i ta bin for di candidatonan, y di un manera of otro nos ta purba di fren’e,” Tomas Ruiz, ken ta fungi como secretario di VRA a declara.

E problema di hende cu tin rijbewijs cu fraude ta representa un peliger pa trafico, pa motibo cu nan no sa ki pa haci ora nan ta yega na un crusada; tambe tin esnan cu a haya nan rijbewijs y nan a lubida tur cos, ademas di esnan cu a no tin rijbewijs y tampoco sa ki pa haci den un crusada.

Ley di trafico a cambia na aña 2000, tur persona cu a pasa examen prome den sistema bieu no sa di e cambionan. VRA ta haya cu si ta posibel pa den futuro lo tin un oficina aparte cu tur e datonan aki cu por deal cu esey. debi cu na Aruba casi 100.000 auto ta core y autoridadnan tin bira mas streng pa esaki, pa tin mas control.

Vehiculonan electronico

Un otro problema cu nan ta mira ta e uso di vehiculonan electronico manera step of trike, cu te na e momentonan aki no tin ni un tipo di regulacion pa loke ta trata ley di trafico, manera VRA a sigura.

Por ehemplo, den definicion di un motorfiets, e trikenan grandi cu tres wheel cu algun compania ta huur ta bisa te cu 600 kilo por core riba caminda; pero den rijbewijs esey no a cambia. “Kiermen si e brommer aki ta pisa 450 of 500 kilo, e ta cay bao e categoria di motorfiets y ora bo ta busca rijbewijs, no tin rijbewijs p’e, pasobra e no ta cay den rijbewijs di brommer y tampoco por bay den B pasobra no tin auto C, pero nan ta huur esaki na turistanan.”

Den e dianan aki, VRA ta bin treciendo dilanti den prensa cierto punto cu nan tin den combersacion pa por cambia den ley di trafico, na unda nan ta puntra autoridadnan concerni: kico ta wardando pa regula esaki, ora tin un accidente cu morto?

Tambe ta bin observando riba caya e uso di step electrico, na unda usuarionan mester tin un seguro pa haci uso di esaki den caso cu un accidente sucede.

Anteriormente step tabata usa pa mucha, pero awor danki na tecnologia, por mira cu adultonan ta haci uso di nan door cu nan ta electrico y nan por core distancianan un tiki mas largo na un velocidad di 30 kilometer pa ora. Pero na momento cu a cuminsa traha esaki, mester cuminsa regula e ley, y un di e luganan cu a haci esaki ta Hulanda.

Regulacion

E comision aki tambe ta mira cu nan como representante di e rijschoolnan no tin regulacion pa trafico y esey ta e motibo di pakico nan a cuminsa traha mas cerca cu Corsou, Hulanda y Sint Maarten. Den esaki Ruiz, a yega di splica cu Corsou tin un sindicato y nan ta regula tur cos via ley. Na Aruba “no tin nada regula cu ta un rijschool oficial, cu ta inscribi na KvK, cu ta paga belasting, por duna les di rijbewijs. Y ademas e cliente no tin un garantia cu e persona cu ta duna les ta al tanto di e materia, dus aworaki bo ta haya cu cualkier hende cu hera a saca rijbewijs awe, mañan nan ta duna les,” el a bisa.

Structura mal traha

Ruiz a haya chens di duna su disertacion na comision central di Parlamento di Aruba na november di aña 2022 tocante e puntonan aki, unda nan a enfatisa tocante examen teorico, cu ta diferente na locual e persona ta bay haya den practica. Pero ademas, tin structura y caminda mal traha y borchinan mal, poni segun el a declara. “Por ehemplo a pone borchi di parkeerplats pa parlamentarionan, siendo cu tin un strepi geel den e rand di acera cu ta indica cu no mag di staciona ni riba, ni banda di e acera y esey ta ley. A traha un ministeriele beschikking pa esaki, pero esey no por bay riba ley.”

Un luga cu tin un parkeerplats incorecto ta Linear Park, unda e luga di parkeer pa personanan handicap tin pintura y no un borchi. “Ley no ta conoce e pintura aki, ley ta conoce borchi,” Ruiz a señala.

Tin rotonde cu tin cu un borchi, pero no tin e strepinan pa un zebrapad, loke ta nifica un confusion debi cu tanten cu no tin e strepinan pinta e no ta un zebrapad, manera un di potret di articulo aki ta ilustra.

Pa e topiconan aki y otronan mas, nan ta bin dunando charla na diferente bario, caminda nan ta bay ta na Centro di Bario Brazil dia 22 di Februari for 7’or te cu 9’or di anochi.