Ayera e veredicto den caso di Mitch Henriquez a keda conoci caminda cu polisnan envolvi a haya seis luna castigo condicional di prizon. Segun politico Desiree de Sousa-Croes (AVP) kende manera nos a informa anteriormente, a sigui e caso aki hopi di cerca na Hulanda, e resultado aki ta un bofta den cara pa famia y tambe pueblo Hulandes.
“Seis luna condicional kiermen cu nan (e polisnan) no ta bay sinta ni un dia. Mas sigur nan no ta bay perde nan trabao,” sra. de Sousa-Croes ta comenta na Bon Dia Aruba. Tambe niun hende a haya sa ken e polisnan ta, nan nomber no a wordo divulga pasobra nan ta pensa cu nan lo a haya suficiente castigo caba por medio di tambe a sufri di tur e noticianan rond di esaki, segun media Hulandes.”
“Mi ta haya esey un bofta den cara di famia y pueblo Hulandes. Pasobra esaki kiermen cu un polis ta parce di ta para riba ley. Unda cu ta duidelijk cu el a maltrata un persona esey si nan lo a hay’e culpabel asina grave cu a resulta den morto di e persona akinan”, e politico ta sigui bisa Bon Dia.
Sra. de Sousa-Croes ta opina cu esaki Hulanda a haci su mes burla di mundo mes cu un sentencia asina akinan, den un caso cu a genera asina hopi publicidad y ta considera cu e polisnan a sufri suficiente. “E ta realmente increibel, mi no tin otro palabra pe.” Sra. de Sousa-Croes ta spera di por haya contacto cu e abogado di famia pronto pa wak kico por haci siguientemente. No por haci mas nada den e caso mes ni por conta mes mas riba Ministerio Publico segun e politico ta splica. A wordo pidi si pa Corte Europeo tuma nota si cu ningun nomber di polis a wordo divulga. Esey en todo caso segun sra. de Sousa-Croes ta splica nos ta algo cu por pasa ainda.
Racismo
“Pa mi e caso aki a duna un golpi hopi grandi mes den confiansa di Cuerpo Policial Hulandes, den e sistema penal Hulandes, den Ministerio Publico y huesnan Hulandes. Asina erg cu ta parce cu huesnan y OM ta un verleng stuk di Cuerpo Policial trahando hunto sin morde otro. Ta keda semper e pregunta e ora ey si esaki toch lo tabata tin un origen racista den dje segun e politico, mirando e manera cu henter e caso akinan a bay. Esaki ta algo cu a wordo comenta varios biaha tambe por medio di manifestantenan mes cu a subi caya na Hulanda protesta contra e sistema hudicial. “Pa tur partido esaki ta un momento di berguensa.”
Caso
Segun media Hulandes, Corte Supremo na Den Haag a dicta cu e causa preciso di e morto di Henriquez no por a wordo determina, pero ta hopi probabel cu e nekklem cu un di e polisnan a uza riba dje tabata e causa principal. E huesnan no a bay di acuerdo tampoco cu e declaracionnan cu Henriquez aparentemente lo mester a muri di un acute stress syndrome. Huesnan tambe a bisa cu e uzo prolonga di e nekklem por medio di un di e oficialnan y tambe uzo di pepper spray por medio di e otro oficial mientras a dal Henriquez den su cara, no tabata na su luga. Henriquez a muri den juli 2015, un dia despues cu el a wordo aresta por medio di un team di cinco oficial di polis na Zuiderpark, Den Haag. Polis ta bisa cu nan a responde despues cu Henriquez a declara cu e tabata carga un arma di candela.
Fiscal Hulandes a laga sa cu e oficialnan tabata culpabel di asalto pero nan no mester wordo castiga pasobra nan a sufri suficiente caba manera nos a yega di trece dilanti caba por medio di noticianan rond di e caso aki cu a wordo publica y menasanan cu a cay riba nan famianan. Imagen di video riba e dia di e sucedido ta mustra Henriquez den un nekklem. Despues e oficialnan a hinca e curpa di Henriquez den un vehiculo y akinan caba por mira cu Henriquez no tabata reaccionando. Su morto a causa varios dia di manifestacion na Den Haag den districto di Schilderswijk, unda cu tin historia di tension caba entre polis cu populacion grandi di stranheronan segun website dutchnews.nl ta informa.
Despues cu un rapport patologico a indica cu Henriquez a muri por medio di e nekklem, dos di e cinco oficialnan di polis na e sitio e dia ey mester a presenta den corte. Tur cinco oficial a wordo internalmente disciplina pero ningun a wordo suspendi. Durante e caso, fiscal a bisa cu a wordo conclui riba e base di otro expertonan cu morto di Henriquez a wordo causa por medio di stress syndrome. Pues cu e oficialnan no mester wordo teni responsabel pa esaki. Sinembargo e patologo forensico kende realmente a examina e curpa a declara cu e nekklem tabata e causa di morto.
Imagen di video
Mayoria di famia di Henriquez a bandona sala di corte durante e ultimo dianan di e caso despues cu a sali dilanti cu e caso a wordo basa riba un imagen di video di mal calidad unda por a mira e detencion di Henriquez. E clipnan a wordo copia for di versionnan cu tabata miho calidad cual a wordo produci den corte por medio di abogado den defensa Richard Korver. Sr. Korver tambe a yama dos oficial di polis cu por lesa lipnan pa studia e imagennan di video den corte.
Media Hulandes ta sigui informa cu testigonan a bisa cu e polisnan tabata bisando na e momentonan ey cu ‘e ta parce cu e ta morto y cu el a stop di responde’. Pero abogadonan den defensa di e polisnan ta bisa cu nan palabra a wordo mal interpreta anto cu locual e polisnan a realmente bisa ta cu Henriquez ta morto cansa na luga di bisa cu e ta morto. Sr. Korver a bisa reporteronan despues di e veredicto cu famianan di Henriquez ta den alivio cu e oficialnan di polis a wordo haya responsabel pa e morto di Henriquez, pero nan ta hopi desapunta cu e oficialnan ta bay scapa castigo di prizon segun sr. Korver.
