Awe tin e veredicto planea den caso di Aruba Birdlife Conservation contra desaroyadornan di proyecto Azure na Bubali y segun presidente di ABC, Greg Peterson, tur locual nan ta haciendo ta un reflexion y ehempel na con abo tambe manera ciudadano por debidamente defende locual bo ta para pe.
Stap pa stap segun sr. Peterson nan ta cumpliendo cu nan rol como organisacion pa yuda bay dilanti cu e proteccion y conservacion di nos naturalesa y medio ambiente hunto cu cooperacion di otro NGO’s (Non Government Organization).
Un cos cu ABC kier enfatisa ta cu nada locual nan ta haci ta puro coincidencia. ‘”E statuten cu nos a traha ta a base di organisacionnan internacional cu ta haciendo e cos ki pa hopi añanan. Nos a tuma contacto cu nan, check e statuten anto pone nan hunto di tal forma cu nos por bay hues, parlamento y cerca ministernan.”
Sr. Peterson ta bisa cu e ta haya yamada di hende cu ta den un bario unda nan ta rosa un tereno anto ta puntra ABC kico nan por haci. “Nos no por defende tur hende of tur cos pasobra nos ta un organisacion relativamente chikito. Sin embargo locual nos ta bisa nan ta cu tin manera si pa cana pa defende bo cas, bario of locual bo ta kere den dje.”
No ta informa adelanta
E activismo ey ta uno cu segun sr. Peterson lamentablemente ora cosnan ta sosode den un bario caminda un bulldozer ta drenta, nan no ta informa bisiña hopi biaha na kico ta pasando.
“Hopi hende ta keda masha desapunta y nan tambe kier manda nan señal. Hasta si un hende pone un nightclub banda di bo cas y tur anochi ta haci desordo, e famia ey tambe por bay hues y bisa cu nan no kier e cos ey banda di nan cas anto esaki ta e señal cu nos ta mandando afo. Mi ta kere cu esey mester na Aruba tambe pa pueblo sa kico pa haci pa defende nan derechonan y crece den un cierto manera.”
E no por ta asina sr. Peterson ta agrega, cu den e parti di construccion di condominio por ehempel, un par di hende cada biaha ta haya tereno, placa y ‘van alles en nog wat’ manera ta wordo bisa na Hulandes y Aruba ta keda perde tur cos.
Batiendo na porta di gobierno
Cu mas di 7.000 firma colecta den un peticion cu a inicia ni dos siman atras, sr. Peterson ta splica Bon Dia Aruba cu esaki ta un peticion cu ta eigenlijk separa di e nan casonan den corte. “Esey ta un peticion cu a bay na e tres instancia grandi di nos pais: pa minister president di Aruba, bay bek pa parlamento di Aruba y tambe gobernador di Aruba. Tur referiendo bek na e mocion cu a wordo unanimamente aproba 6 di februari 2013 cu un peticion masha cla pa regla e cuenta.”
E firmanan aki ta mayoria di hende local anto segun sr. Peterson. “Nos ta batiendo na nan porta cu esaki pa regla e asunto ki pa mantene e 16 areanan di naturalesa aki protegi y bao di Parke Arikok”, e ta bisa agregando cu tur locual nan ta haci ta paso pa paso y seguramente falta hopi otro caso cu nan lo sigui persigui den futuro.
Dumpnan ilegal
Sr. Peterson ta conta Bon Dia Aruba con nan a cuminsa un tempo atras na proteccion di e shoco
cual a bay asina bunita cu el a bira un simbolo nacional. Hunto cu parke a organisa tambe na conscientisa kico pa haci ora bo topa cu un boa y tambe pa pone un stop na dumpnan ilegal. “Cada biaha nos ta concentra riba un cos y despues sigui na e otro. Por ehempel e dumpnan ilegal tambe tabata un proyecto di nos. Nos a traha un film di esey anto a base di esey eigenlijk minister president a lanta un comision pa analisa y duna conseho. E cos a bay Conseho di Minster, Parlamento y hasta Ministerio Publico pa haci algo.”
Tin dos fase den un proyecto particular manera esun di dump ilegal cual ta prome pa stop di tira sushi eynan anto despues haci e sushi limpi. E ultimo parti no a tuma luga ainda. Anto aki aya tin hopi comentario cu tin hende ta sigui tira sushi den e diferente areanan aki rond di e isla keto bay uzando nan manera dump. “Nos no por laga tur e sushi ey den tera pa e siguiente generacion un dia lanta anto wak cu nos a venena henter e awa bou suela. Esey ta un di e cosnan cu nos ta bay sigui bin bek riba dje”, sr. Peterson ta expresa.
