(LaPatilla) – Yobida fuerte den ultimo dianan a percura pa situacion di emergencia na varios parti di Venezuela, principalmente na estado Merida, unda un di e lugarnan mas afecta tabata Tovar.
Awa a pasa destrui tur cos den su caminda, di cual a aparece varios imagen riba rednan social. “Imposible no recorda e tragedia di Vargas mirando e imagennan aki,” un usuario a comenta, refiriendo na e desastre grandi na Vargas di algun aña pasa. Presidente de facto Nicolas Maduro a duna diamars anochi un saldo di 15 morto y 6 persona desapareci te e momento ey.
Gobernador di estado Merida, Ramon Guevara, a confirma morto di 15 persona na Tovar y tres mas na Pueblo Nuevo, ambos den estado Merida. Guevara a informa cu por lo menos 80 vivienda a bay perdi completamente na Tovar, mientras cu 1.400 viviendaa keda afecta na Tovar so.
Maduro a informa cu en total na 85 municipio tin mas di 8.098 vivienda afecta, cu un total di 9.322 famia afecta te na e momento ey. E cantidad di persona desapareci a keda limita na cuatro. Tambe el a declara cu a cay 65% mas awa cu den añanan anterior, loke el a atribui na “e cambio di clima, motibo pa poder popular actua rapidamente”. “Mi ta firmando un decreto di emergencia pa e zona di desastre. Mi a paroba e recursonan na bolivar, criptomoneda y divisa convertible pa apoya pueblo di Merida,” Maduro a declara.
Tocante su recorido den e zona mas afecta, gobernador Guevara a bisa cu “Ta parce cu ta un horcan a pasa y cu a caba cu e viviendanan.” Videonan comparti riba rednan social ta mustra camindanan obstaculiza pa piedra gigantesco, matanan cu a cay y sedimento di tera, mientras otro ta mustra vivienda cu a keda bao tera.
