(LaPatilla/EFE) – E organisacion no gubernamental (ONG) Medicos Unidos de Venezuela (MUV) a denuncia ayera cu 15 trahador di salud mas a fayece na e pais, a consecuencia di Covid-19 y esaki ta trece e total di victima di sector salud na 499, desde comienzo di e pandemia. Den un mensahe riba Twitter e organisacion a señala cu e recuento di 15 trahador di salud cu a fayece ultimamente ta den e periodo di 16 pa 21 di april.
Di acuerdo cu e informacion, entre e fayecidonan tin seis medico ciruhano, tres enfermera, dos medico comunitario y un tecnico di traumatologia. Tambe e reporta fayecimento di un trahador administrativo, un obrero y un vigilante di centro di salud. Di e victimanan aki, 85 a tuma lugar na estado Zulia. Ta sigui Caracas cu 78, y estado Carabobo cu 49.
Segun e cifranan di regimen di Maduro a muri 1.965 persona pa complicacion di salud causa pa e virus SARS-COV-2, cu ta causa Covid-19, di e 186.745 persona cu a contrae e enfermedad. Ministro di Comunicacion di e dictadura, Freddy Ñañez, a informa diarazon pasa cu e pais a yega na un record nobo pa morto riba un dia, ora a conta 21 caso riba e dia ey. Diasabra pasa cerca di 100 trahador di salud na Caracas a tene un demostracion pa exigi di gobierno Chavista un plan di vacunacion pa henter e sector “sin criterio politico”.
Ministro di Salud di e regimen, Carlos Alvarado, a bisa cu alrededor di 200.000 trahador di salud, ademas di 50.000 voluntario di un plan gubernamental cu ta trata di busca contagio di cas pa cas, a ricibi vacuna contra Covid-19. Sin embargo, di parti di Colegio di Enfermero di Caracas ta duda cu e cifranan ey por ta veridico.
