(ElNacional) – Yamaha lo reanuda ensamblahe di motorcycle na Venezuela na 2023; esey tabata e anuncio di Claudio Ippolito, presidente di e empresa Venemotos S.A., ken a duna detaye di e plannan cu nan ta contempla pa e proximo aña.
E empresa Yamaha Venezuela ta preparando detaye pa reanuda fabricacion di motorcycle, despues cu den ultimo añanan practicamente henter e sector di ensamblahe di auto y otro vehiculo a termina nan operacion na e pais, en vista di e situacion dificil pa opera. E oportunidad cu Claudio Ippolito, presidente di Venemotos S.A. ta mira actualmente, ta relaciona cu e problema cu Hapon lo tin cu suministro di pieza, pa cual no por a cumpli cu varios pais. Sin embargo, el a declara cu pa 2023 e problemanan ey lo ta resolvi y por cuminza atrobe cu ensamblahe na Venezuela, segun Ippolito, cu a duna un entrevista den e programa “2 minutos en la industria” na television gubernamental.
Ippolito a recorda cu Yamaha tin 61 aña di historia na e pais. “Nos a haci hopi pa Venezuela den e parti deportivo y productivo”. Orlando Camacho, presidente di Fedeindustria y conductor di e programa, consult’e acerca di aportenan cu e empresa tin den deportenan extremo y e propietario di Yamaha a contesta: “Venezuela ta e unico pais di Latinoamerica, di Mexico te Argentina, cu tabatin dos campeon mundial y cuatro campeonato mundial. Nan ta Johnny Cecotto y Carlos Lavado. Esey ta algo hopi importante, cu mester menciona, pasobra Venezuela a logra esey cu nos tata, fundador di e empresa”.
Ippolito a considera cu e epoca actual ta e momento ideal pa inverti den e pais. “Mi ta kere cu ta e momento apropia pa sigui inverti den e pais pasobra por logra hopi cos. Unda na otro pais tin crisis, Venezuela ta saliendo dilanti, mi ta kere cu esaki ta e momento pa no tin miedo”.
