Segun autoridadnan Venezolano den un nota di prensa, divulga pa Globovision, tin negociacionnan andando entre Venezuela y Reino Hulandes “cu e obhetivo di (..) habri relacionnan comercial atrobe entre Republica di Venezuela y e islanan Aruba, Bonaire y Curaçao”. Vice-ministro pa Europa di ministerio di Relacion Exterior di Venezuela, Yvan Gil, tabatin un encuentro cu e encargado di Asunto di embahada di Reino Hulandes na Venezuela, Robert Schuddeboom.

“E ta un proceso cu nos ta bin desaroyando paulatinamente y awe nos a acorda e mapa di ruta cu lo permiti nos establece e mecanismonan pa inicia un proceso di normalisacion referente e fluho comercial y di persona pa e islanan ABC,” vice-ministro Gil a informa, ken tabata acompaña den e reunion pa representantenan Venezolano di e organismonan encarga cu trafico aereo, maritimo y comercial, segun e nota di prensa.

E nota ta sigui bisa: “Den e sentido aki, Venezuela a acorda cu Reino Hulandes pa manda e documentacion actualisa di e puertonan maritimo cu e detayenan di e exportacion y e garantianan cu estado Venezolano lo ofrece, pa autoridadnan Hulandes por analisa nan y inicia formalmente e operacionnan.”

Segun e nota: “E fronteranan entre Venezuela y e islanan Aruba, Bonaire y Curaçao ta manteni cera desde februari 2020, como consecuencia di e posicion asumi pa Hulanda, alineando cu gobierno di Estadonan Uni pa aumenta e agresionnan contra gobierno Bolivariano.”

“E relacionnan bilateral entre Venezuela y Hulanda ta caracterisa pa su dinamismo y importancia strategico, especialmente pa e cercania geografico cu e islanan Aruba, Bonaire y Curaçao. Den epocanan reciente, e cooperacion bilateral tabata centra den areanan manera agricultura, defensa, antidroga, migracion y aduana; sin embargo, den ultimo añanan a keda afecta pa e efectonan di e medidanan coercitivo unilateral imponi pa Estadonan Uni y su aliadonan, dificultando e capacidad di intercambio comercial di e pais Suramericano cu socionan internacional.”

Redaccion di Bon Dia Aruba a tuma contacto cu Representacion di Hulanda na Aruba (VNO), unda a informa nos cu e tipo di asunto aki ta tuma lugar directamente via ministerio di Asunto Exterior na Den Haag. Nos a haya un contacto di e representacion pa atende e asunto na Den Haag, pero e diferencia di orario no a duna pa haya un contesta.

Tambe redaccion a tuma contacto cu Promer Ministro Evelyn Wever-Croes encuanto e asunto aki, cu a declara cu Aruba su maneho actual ta pa tene frontera cera ainda. Aruba a caba di prolonga e ciere di frontera te 10 di maart 2021. Esaki ta sucediendo cada tres luna, asina desde mei 2019, cu evaluacion cada vez, segun e mandatario. Di otro banda, Wever-Croes ta señala cu e ta realisa cu e frontera no por keda cu frontera cera cu un pais cu cual no ta na guera.

Ta remarcable cu e autoridadnan Venezolano ta haci uso di e oportunidad pa presenta dato falso, ya cu, manera promer ministro a indica, e ciere a inicia na mei 2019, pa e problemanan cu tabata existi den e trafico entre e paisnan, y no tabatin relacion cu e sancionnan Mericano imponi na februari di e aña aki. Redaccion di Bon Dia Aruba ta spera di por haya un reaccion ainda di ministerio di Asunto Exterior di Hulanda riba e asunto aki.