Despues cu e empresa Mericano AT&T, propietario di e empresa di cable Directv Venezuela, a dicidi di para su operacion na e pais, e Frente di Usuario pa Defensa di Derechonan di Comunicacion, di corte Chavista,a introduci un demanda diamparo constitucional cerca Tribunal Supremo di Husticia (TSJ) contra e empresa.
Den e texto introduci na Sala Constitucional, nan ta boga pa e “inmediato restablecimento di e derecho y garantianan constitucional” di e mas di 6 miyon usuario cu tabata haya e servicio.
Alberto Scharffenorth, ex-presidente di e Camara di Empresa di Servicio di Telecomunicacion (Casetel), a mantene su opinion cu e introduccion di e demanda no ta garantisa cu ta bay restablece e servicio den teritorio Venezolano, ni cu por sentencia e empresa pasobra el a para su operacion.
“Un empresa di origen stranhero, cu dicidi di para su operacion na Venezuela, dificilmente por ser sentencia, persigui y someti na algun accion legal particular y menos e tipo di accion legal cu ta buscando aki ya cu e momento di para su operacion den e teritorio ya no ta existi,” el a bisa den entrevista cu 2001Online.
Scharffenorth a agrega cue empresa ya no ta someti na un regulacion den materia di telecomunicacion mercantil general pasobra, simplemente, ya no ta existi y, por lo tanto, ta kere cu ta “hopi dificil” pa e Tribunal Supremo exigi tal restitucion di servicio di DirecTV Venezuela.
E demanda den Tribunal Supremo ta parce mas bien un intento di gobierno Chavista pa mantene nan base di apoyo popular contento cu e accion legal.
