Union Europea (UE) a rechasa ayera e decision di e Asamblea Nacional Constituyente (ANC) di Venezuela pa termina e inmunidad parlamentario di lider opositor Juan Guaido, reconoci como presidente interino pa alrededor di 60 pais, pasobra ta considera esaki un “grave violacion” di estado di derecho y di separacion di poder.
Den un declaracion na nomber di e 29 paisnan, e alto representante di UE pa politica exterior, Federica Mogherini, a afirma cu e decision ta un grave violacion di constitucion Venezolano y cu e unico organismo cu competencia pa kita inmunidad di un miembro di parlamento ta Asamblea Nacional (esun oficial reconoci).
Diamars pasa e asamblea constituyente segun modelo Cubano, un foro imponi pa Nicolas Maduro, no reconoci pa oposicion y pa gran parti di comunidad internacional, a aproba, sin bisa esaki expresamente, pa kita inmunidad di Guaidodespues di acus’e di acto terorista y crimen contra humanidad.
“E actonan aki ta debilita e salida politico di e crisis y solamente ta conduci na un aumento di polarisacion y un aumento di e tesionnan den e pais,” Mogherini a expresa.
Union Europeo a pidi pa respeta e prerogativonan contempla den constitucion di Venezuela y inmunidad di tur miembro di Asamblea Nacional, incluyendo esun di Juan Guaido.
Mogherini a adverti cu e derechonan civil, libertad y integridad fisico di e parlamentarionan mester ser respeta na tur momento, di tal forma cu nan mester por realisa nan labor liber di cualkier intimidacion.
Tambe el a destaca cu UnionEuropeo lo sigui e situacion na Venezuela y cu lo usa “tur medida apropia” pa responde riba e acontecimentonan.
