Union Europeo (UE) ayera a urgi Nicolas Maduro pa evita decision cu ta caba di mina mas ainda democracia na e pais, despues di su propuesta pa hala eleccion legislativo mas dilanti, cu normalmente mester tuma lugar na december 2020.
“Cualkier decision o accion cu ta mina mas ainda democracia y estado di derecho na e pais solamente lo haci mas dificil pa yega na un solucion pacifico den e crisis actual,” e portavoz comunitario di relacion exterior, Maja Kocijancic, a bisa den rueda di prensa diario di Comision Europeo.
E portavoz a pidi pa respeta Constitucion y e principionan democratico na Venezuela. “Nos a bisa repetidamente cu nos ta apoya Asamblea Nacional como e unico organismo elegi democraticamente. Nos ta spera cu ta respeta plenamente e podernan constitucional, tambe den e contexto aki,” el a declara.
El a afirma cu “nos no ta kere cu e solucion di e crisis di e pais lo ta disolucion di Asamblea Nacional, sino e organisacion di eleccion presidencial husto.” “Nos ta sigui pidi pa e eleccion presidencial ey,” el a insisti.
Kocijancic a recorda tambe cu e Grupo di Contacto cu Union Europeo, constitui pa yuda pa papia cu tur partido na Venezuela y crea condicion pa eleccion presidencial husto, tabatin su di tres reunion ministerial na Costa Rica e luna aki.
E grupo a manda un mision politico pa Caracas siman pasa pa discuti un ruta cu ta permiti convoca e eleccion ey. “E trabao di banda politico y humanitario ta continua,” e portavoz comunitaria a conclui.
