E organisacion di Nacionnan Uni pa atende asunto di mucha, Unicef, a informa ayera cu nan mester por lo menos seis miyon dollar pa yuda 60.000 mucha bay scol y mantene nan studiando tambe, a traves di un programa di alimento escolar.
Tambe tin mester tres miyon dollar pa yuda casi 400.000 mucha Venezolano contra enfermedad evitable den proximo tres luna.
E apelacion ta forma parti di un reporte di Fondo di Nacionnan Uni pa Mucha divulga ayera cu ta afirma cu un falta di financiamento pa e programanan pa zona di conflicto y desastre ta pone bida y bienestar di miyones di mucha na peligro den henter mundo.
Unicef a informa cu di un apelacion humanitario di 4.000 miyon dollar, solamente a ricibi 54% di e contribucionnan ey drentando den ultimo tres luna di 2019.
E fondonan lo yuda pa provee e aña aki servicio basico di atencion di salud, educacion, nutricion y proteccion di 41 miyon mucha na 59 pais.
Segun e director ehecutivo di Unicef, Henrietta Fore, cu sin e recursonan cu falta, miyones di mucha ta keda sin haya vacuna, no ta haya e nutricion necesario ni haya proteccion contra abuso y violencia.
“Mientras Unicef ta sigui apela pa un fin di e conflictonan y un miho capacidad pa atende emergencia, nos mester apoyo adicional di donante cu ta yuda nos cumpli cu e necesidadnan mas basico di e muchanan,” segun Fore.
Venezuela ta ocupa e cuarto lugar entre e paisnan cu mester di mas contribucion, despues di Pakistan, Camerun y Burkina Faso. Otro pais cu emergencia grandi, manera Siria, Yemen, Republica Democratico di Congo y Bangladesh, tampoco tin suficiente recurso.
