Segun e corant di Florida El Nuevo Herald , Cas Blanco a bolbe studia un posibel embargo petrolero, na momento cu gobierno di presidente Trump ta debati con pa responde riba e eleccion planea pa presidente Venezolano Nicolas Maduro, pa april proximo, cu Washington ya a cualifica como ilegitimo.

Conseho di Siguridad Nacional, Departamento di Estado y Departamento di Tesoro ta entre e organismo nan cu ta studiando y consultando cu asesornan tocante un lista di opcion pa yuda saca Maduro di poder.

Entre e medidanan cu ta studia tin un embargo petrolero completo, cu lo prohibi e benta di cualkier cantidad di crudo Venezolano na Estadonan Uni, o blokia e benta di producto Mericano relaciona cu petroleo na Venezuela, segun funcionario y asesornan di gobierno di Trump.

Gobierno tambe ta studia sancion contra Diosdado Cabello, considera e segundo persona mas poderoso di Venezuela y lider di e partido gobernante, señalando cu Canada ya a sanciona Cabello pa violacion di derecho humano. “E mensahe ta cu nos lo sigui aumenta presion te ora e regimen di Maduro keda elimina y cu democracia bolbe na Venezuela”, asina McClatchy, un Alto funcionario di gobierno Mericano a declara dialuna pasa.

E posibilidad di afecta significativamente e mercadonan petrolero ta asina serio cu secretario di Estado, Rex Tillerson, papiando na Austin, Texas, a propone e posibilidad di utilisa e reservanan di crudo di Merca pa yuda alivia e impacto. Trump a propone bende parti di e reserva, cu na e momento aki ta na 700 miyon bari, y Tillerson a bisa cu por uza esaki pa yuda e aliadonan regional di Merca y pa compensa e perdidanan di empresa Mericano afecta pa e sancionnan petrolero contra Venezuela.

“Como cu ya tabata di bende esaki, por uza e petroleo pa entrega na e refinerianan cu lo sufri di un embargo petrolero contra Venezuela”, Russ Dallen, socio gerente di e banco di inversion Caracas Capital Markets, a bisa. E ta sigui e pista di e envionan Venezolano di crudo y ta asesora funcionarionan Mericano encuanto asunto Venezolano.

Trump tin un mapa di ruta ascendiente formula pa su assistentnan cu ta contempla sancion economico y individual pa strangula economia Venezolano. Pero te na e momento aki, Trump no a yega na aplica e asina yama ‘opcion nuclear’: e sancionnan petrolero, cu por hoga gobierno di Caracas, cu ta depende casi exclusivamente di petroleo pa su entradanan y cu mester efectivo desesperadamente, mey mey di un profundo crisis economico y humanitario.

Gobierno Mericano a fortalece su retorica den direccion di Venezuela den ultimo simannan, di duna indicio di sancion nobo te virtualmente garantisa consecuencia significativo si gobierno di Maduro ta sigui desmantela institucionnan democratico di e pais. E ta un cambio cu ta refleha e postura di un gobierno cu a yega na acepta e posibilidad cu Maduro ta busca manera ingenioso pa keda na poder den futuro previsibel, a pesar cu e pais ta al borde di un collapse economico.

“Ora yega dia 22 di april, y nos ta anticipa cu Maduro lo keda reeligi pasobra e ta haci trampa den e sistema y lo no tin ningun hende cu ta postula como adversario, nos lo ta bay tin seis aña mas di Maduro. Ey ta unda Merca lo mester tuma e decision ta te unda e kier yega cu e sancionnan”, e Alto funcionario Mericano a bisa.