(LaPatilla) – Tres vuelo humanitario cu lo mester a sali e luna aki for di Aruba (1) y Corsou (2) cu destino pa Venezuela a keda suspendi te cu proximo aviso.
Tur esaki ta tuma luga despues cu e Vice-Presidente di e regimen chavista a denuncia dia 13 di december cu e Reino Hulandes a impedi su vuelo pa Den Haag, unda e tabatin premira un reunion cu e fiscal di e Corte Penal Internacional (CPI), Karim Khan.
“E suspension di e vuelonan humanitario ta relaciona cu e caso di Delcy Eloina Rodriguez. Aworaki mes e relacion cu Hulanda ta freeze”, un fuente politico ta sostene.
Di otro banda, un persona relaciona cu e logistica di e vuelonan humanitario ta agrega: “E Instituto Nacional di Aeronautica Civil (INAC) no a duna e permisonan. No ta e prome biaha cu e ta pasa, mester warda wak kico nan ta dicidi na Caracas, den e casonan aki e Gobierno di Venezuela semper tin e ultimo palabra”.
E avion di Aruba mester a yega diadomingo 19 di december y esunnan di Corsou lo mester a yega diamars 21 y diaranson 22 di december. Un comunicado publica diamars pa e autoridadnan di Corsou ta señala cu “e gobierno di Republica Bolivariana di Venezuela, INAC, no a autorisa e vuelonan, aunke anteriormente, dia 9 di december, e vuelonan si a wordo autorisa”.
E texto oficial di Willemstad ta agrega: “E departamento di Relacionnan Exterior di Corsou, e Consulado di e Republica Bolivariana di Venezuela y e compania Laser Airlines a haci tur esfuerso pa logra e autorisacion, pero sin e resultado desea”.
