(ElNacional) – Maestro, enfermero y demas trahadonan publico a anuncia cu dia 1 di mei, Dia di Obrero, nan ta bay realisa un gran mobilisacion na e ciudad di Caracas pa exigi miho salario.
E concentracion ta cuminsa na Plaza Venezuela pa 10or di mainta, segun e anuncio realisa pa e presidente di Formacion di Dirigentenan Sindical (Fordisi), Gricelda Sanchez.
“Maestro, administrativo, obrero, mayor- y representantenan cu a compaña nos durante tur e tempo aki, y cu conhuntamente cu otro trahadonan nos a mobilisa pa salarionan husto, uni cu nos dia 1 di mei, pa 10or di mainta na Plaza Venezuela. Ey tur e sectornan di e pais ta bay concentra. Uni. pasobra esaki ta un situacion cu ta oprimi tur e ciudadanonan,” Sanchez a señala den un video publica ariba rednan social.
Durante un protesta realisa diahuebs dilanti Hospital Magallanes de Catia, Mauro Zambrano, coordinador general di e Red Sindical Venezolano y Monitor Salud, tambe a confirma e mobilisacion di dialuna proximo.
El a señala cu ademas di Plaza Venezuela, otro punto di encuentro ta bay ta Chacaito. For di e lugarnan aki e trahadonan lo mobilisa te na e Fiscalia General di e Republica.
El a denuncia cu e ingreso di e trahadonan publico ta di 5 dollar pa luna aproximadamente, mientras cu e basket basico di alimento ta alrededor di 500 dollar, door di cual nan no por cubri nan gastonan basico.
“No por ta posible cu awe nos ta ganando 5 dollar pa luna. Esey ta e realidad cu nos ta biba no solamente na e centronan di salud, si no tambe educadornan y tur e Venezolanonan. E ehecutivo nacional sa loke e trahadonan ta bibando y riba esey nos a yega na acuerdonan cu diferente sector di e pais,” el a bisa na e medionan di comunicacion.
Zambrano a sigura cu tur e trahadonan ta bay keda riba e cayanan di Venezuela pa exigi respet pa nan derechonan cu e meta di logra un miho calidad di bida pa nan famia.
