Varios barco di PDV Marina, subsidiario di Pdvsa, ta permanece mara na e wafnan di Punto Fijo, estado Falcon, pega pa e sancionnan economico Mericano y pa falta di tripulacion, asina fuentenan vincula na e industria a revela, segun informacion di El Universal. PDV Marina ta e empresa estatal filial di Pdvsa cu ta encarga cu distribucion y transporte maritimo di hidrocarburo y derivado. E ta consisti di varios barco stranhero bao areglo di flete pa e compania estatal.
Freddy Garcia, cu tabata traha como ingeniero di puerto, a bisa cu el a conta diesun barco di e flota Venezolano “bandona” den bahia di Punto Fijo, dilanti refineria di Amuay.
Garcia a conta 56 barco cu Venezuela a perde den transporte maritimo petrolero, entre nan 26 barco di carga di Compañía Venezolana de Navegacion (CAVN), cu a bira PDV Marina.
El a conta cu gobierno a busca tripulacion pa e barconan aki dentro di armada Venezolano, pero a observa cu e personal militar ta carece di formacion tecnico pa opera e tipo di embarcacion aki.
Segun Garcia ta Universidad Maritimo di Caribe (UMC), na Catia La Mar, ta e unico institucion unda ta forma ingeniero maritimo, pero debi na e situacion na e pais hopi di nan a emigra y pa nan formacion nan ta atractivo pa otro paisnan.
E declaracion di e ex empleado petrolero a keda confirma pa un fuente vincula cu sector di marina mercante. El a detaya cu actualmente e flota petrolero ta conforma pa 23 barco cu ta opera den condicion di flete pa companianan di exterior.
Si Venezuela por a controla solamente 50% di e volumen di carga cu ta move actualmente, e nacion lo mester a conta cu mas di 300 barco, pero nunca a pasa di tin 30.
