Alto Comisionado di Nacionnan Uni pa Derecho Humano, Michelle Bachelet, tabata di bishita diaranson pasa cerca gobierno Venezolano, representa pa canciyer Jorge Arreaza. E canciyer a reconoce cu e regimen di cual e ta forma parti tin desafio pa enfrenta den materia di derecho humano.
Despues di ricibi Bachelet, Arreaza a sigura cu e regimen di Nicolas Maduro ta dispuesto pa “coregi” loke ta haci falta, na man di e organismo mundial.
“Nos kier pa oficina di e alto comisionado di manera constructivo recomenda, sugeri, orienta nos, pa por bay man teni cu nan (…) pa coregi loke mester coregi, rectifica unda mester rectifica, pa por preserva derecho humano di e Venezolanonan,” Arreaza a bisa.
Agencia AFP a divulga cu oposicion ta acusa e regimen Venezolano di un violacion sistematico di e garantianan fundamental y di a hinca e pais den e crisis socioeconomico mas grave di su historia moderno.
Den un declaracion a traves di television gubernamental, e canciyer a añadi cu tambe a combersa cu Bachelet tocante e impacto dañino di e “blokeo financiero y comercial”, manera ta referi na e sancionnan di Estadonan Uni pa asfixia gobierno di Maduro.
Segun Caracas, e medidanan punitivo di Washington ta complica importacion di alimento, medicina y material pa hospital, y a causa economia un daño calcula na 30.000 miyon dollar. E ministro di Relacion Exterior a subraya cu ta trata di un “blokeo ilegal, cu ta bay contra derecho internacional.”
Tambe el a compromete pa facilita e reunionnan cu Bachelet tin programa cu funcionario di gobierno y demas podernan publico, como tambe cu organisacionnan di derecho humano.
Durante su estadia na Caracas, cu ta termina awe, e ex-presidente Chileno tin encuentro planea cu Maduro y cu presidente interino Juan Guaido.
