(AP) — Venezuela un biaha mas ta bay acepta vuelonan di repatriacion for di Merca, transportando su ciudadanonan deporta, despues di yega na un acuerdo cu Merca, segun un oficial Venezolano a bisa riba rednan social diasabra.
Presidente di Venezuela, Nicolás Maduro, a suspende vuelonan dia 8 di maart despues cu Departamento di Tesoro di Merca a anuncia eliminacion di e licencia di Chevron pa exporta petroleo Venezolano.
“Nos a palabra cu gobierno di Merca pa reanuda e repatriacion di migrantenan Venezolano cu un vuelo inicial mañan, diadomingo,” Jorge Rodríguez, presidente di Asamblea di Venezuela y negociador principal di Maduro cu Merca, a bisa.
Venezuela a acepta e acuerdo pa garantisa “e regreso di nos compatriota na nan pais cu e proteccion di nan Derecho Humano,” Rodríguez a bisa.
Den su declaracion, Rodríguez a referi na deportacion di gobierno di Donald Trump di mas cu 250 Venezolano na un prison di seguridad halto na El Salvador.
“Emigra no ta un crimen y nos no lo stop te ora nos logra e regreso di tur esnan cu lo rekeri esaki y te ora nos rescata tur ruman cu a ser horta na El Salvador,” Rodríguez a bisa.
Maduro a ratifica e medida den un evento publico mas atardi e mesun dia. “Nos ta reanuda vuelonan pa rescata y libera migrante for di e prison di Merca.”
E lider Venezolano a bisa tambe cu e ta tene presidente di El Salvador, Nayib Bukele, responsable pa e bienestar di esnan deporta na nan pais.
“Bo ta garantisa nan salud y, mas pronto posibel, bo mester entrega nan y libera nan, pasobra nan a ser horta,” Maduro a bisa.
Trump a alega cu e deportadonan ta miembro di e gang Tren de Aragua. El a nombra Tren de Aragua como un forsa invasor ariba 15 di maart ora cu el a enfoca e Alien Enemies Act, un ley poco usa di 1798 cu ta permiti e presidente deporta cualkier persona no-cuidadano durante tempo di guera. Un hues federal a emiti un orden pa temporalmente stop deportacion, pero vuelo ya caba tabata den laira ora e resolucion a sali.
Tren de Aragua, cu Departamento di Estado di Merca a designa como un organisacion terorista stranhero, tin su origen den un prizon den e pais Sur Americano. Miembronan di e gang aki a sigui un exodo di miyon di Venezolano, mayoria di nan cu tabatin meta pa busca un mihor bida despues cu e economia di nan pais a crash den e ultimo añanan.
Administracion Trump no a duna evidencia cu e deportadonan ta miembro di Tren de Aragua of cu nan a comete algun crimen na Merca.
Gobierno di Maduro a nenga di acepta entrada di inmigrante deporta for di Merca. E deportacionnan aki ta sigui aumenta drasticamente desde Trump a asumi su cargo dia 20 di januari.
Durante siman pasa, mas o menos 350 persona a ser deporta na Venezuela, incluyendo 180 persona cu a pasa 16 dia den base naval di Merca na Guantanamo Bay, Cuba.
Administracion Trump a bisa cu e Venezolanonan cu a bay Guantanamo ta miembro di Tren de Aragua, pero no a duna evidencia pa sostene esaki.
