Durante prome ocho luna di 2019 produccion di crudo na Colombia a yega na promedio di 888.000 bari pa dia (bpd), superando pa prome biaha den historia esun di Venezuela, cu di jjanuari pa augustus 2019 tabatin promedio di 835.000 bpd.
E produccion di crudo di Colombia a mustra un aumento di 3,56% compara cu e prome ocho lunanan di aña 2018 , tempo cu a registra promedio di 857.671 bpd. En cambio Venezuela a produci na 2019 4,15% menos cu loke nan a produci den e prome ocho luna di 2018, cu tabata un promedio di 1.419.000 bpd.
Na luna di augustus Colombia a obtene un produccion promedio di 882.831 bbpd, loke ta representa un incremento di 1,8 % compara cu augustus 2018 (866.460 bpd). Den caso di Venezuela produccion di 712.000 bpd na augustus tabata -41,8% compara cu e 1.224.000 bpd cu tabata produci ainda na augustus 2018.
Venezuela y Colombia den direccion contrario
Durante 2009 pa 2012 produccion petrolero Colombiano a logra aumento importante, pasando di 671.000 bpd na 2009 pa 944.000 bpd na 2012. Despues di esey e produccion a stabilisa alrededor di 900.000 bpd.
Den e mesun lapso 2009-2012 produccion di Venezuela a mantene un promedio di 2,35 miyon bpd. Sin embargo desde 2016 produccion a cuminsa cay rapidamente, cu e monopolio petrolero estatal Pdvsa, cu problema di corupcion, falta di mantenimento, salida di personal y desinversion.
Na november 2017 Nicolas Maduro a pone un general di Guardia Nacional, sin experiencia di petroleo, na cabes di Pdvsa. Na e momento ey ainda Venezuela tabata produci 1,80 miyon bpd. Actualmente, na menos cu un aña, e pais no ta produci ni mita di esey mas. Produccion di september ultimo tabata na 644.000 bpd, apenas 27,4% di e produccion na januari 2014.
