(LaPatilla/EFE) – Organizacion di Nacionnan Uni (ONU) lo trece nan plan di aimentacion escolar na un miyon mucha na Venezuela na 2023. E Programa Mundial di Alimento di Nacionnan Uni (World Food Program; WFP) a anuncia diamars pasa cu lo expande e programa te na un miyon mucha, un meta cu ta bay tin mester di 190 miyon dollar di financiamento humanitario.
Director ehecutivo di WFP, David Beasley, a conclui diamars un bishita di dos dia na e pais den cual el a revisa parti di e proyectonan implementa, a topa cu representantenan diplomatico y a tene un reunion priva cu Nicolas Maduro.
Den un nota di prensa e organizacion a splica cu e director a bishita estado oSucre, unda “el a reuni cu personal docente, famia y studiante durante un distribucion di alimento den dos centro educativo, como tambe cu autoridadnan local”. Programa Mundial di Alimento a gradici tur e partidonan pa brinda oportunidad na muchanan na Venezuela. Nos por y nos mester hopi mas pa hende na e pais aki,” Beasley a bisa, cita den e nota di prensa, den cual ta splica cu e expansion di operacion “lo inclui e temanan di desaroyo y resiliencia”.
“E personanan a conta mi cu nos programa di cuminda escolar a haci e diferencia pa nan. El a yuda nan pa ocupa nan mes cu otro prioridad, sabiendo cu al menos e alimento basico ta garantiza”, el a añadi.
Tocante e reunion cu Maduro, e representante di WFP a sigura cu el a sirbi pa acorda e aumento den cantidad di beneficiario, cu actualmente ta inclui 430.000 persona, cu ta ricibi canasta di alimento pa hiba cas, den 8 di e 23 estadonan di e pais. E programa a inicia operacion na Venezuela na april 2021 y a keda crece encuanto su alcance, y ta anticipa pa yega na 16 region di e pais na 2023.
