Autoridadnan na Venezuela ta bisa cu a habri un embahada na Nort Korea, fortaleciendo e relacion entre e dos pais, cual a cuminsa decadanan atras.
Gobierno di presidente Nicolas Maduro na Caracas a anuncia ayera cu a inaugura e embahada den e capital Nort Koreano di Pyongyang.
Ambos pais ta bou sancionnan financiero estricto for di Merca.
Relacion diplomatico entre Caracas y Pyongyang ta data for di 1965, y e lasonan a intensifica ora presidente Venezolano, Hugo Chavez, a asumi su cargo na 1999.
E socialista Maduro a cultiva e relacion mas leu, ricibiendo presidente di parlamento Nort Koreano, Kim Yong Nam, durante un bishita na Caracas aña pasa.
Maduro a rechasa presion politico intenso for di Merca e aña aki pa bandona poder, cu sosten di aliadonan internacional manera Cuba, Rusia y China.
