(ElNacional) – Venezuela a firma un permiso pa exportacion di likido di gas natural di Cardon IV, un empresa conhunto entre e empresa Spaño Repsol y e empresa Italiano Eni, asina e estatal petrolero PDVSA a informa diadomingo.
E Minister di Petroleo y presidente di PDVSA, Pedro Tellechea, a firma e permiso den presencia di e autoridadnan di e companianan energetico Europeo, e empresa estatal a señala a traves di su cuenta di Twitter. Ademas, el a comparti un potret di e encuentro.
PDVSA tambe a informa di un reunion cu, como parti di e politica energetico di e presidente Nicolas Maduro, Tellechea a celebra cu directivanan di e empresa Cardon IV, na e planta di tratamento di gas Tiguadare, ubica na estado Falcon.
E encuentro, den cual e director general di Eni Venezuela, Francisco Gasparri, a participa, a permiti e intercambio di puntonan di interes comun cu ta inclui plan pa aumenta e produccion di gas di campo Perla. Esaki ta ubica den e Golfo di Venezuela, alrededor di 30km leu di e Peninsula di Paraguana, e punto mas Artico di e pais, dilanti e lama Caribe.
Dia 2 di februari di 2006, e gobierno di e presidente e tempo ey, Hugo Chavez, a otorga na Cardon IV e licencia di exploracion y explotacion di gas natural no asocia na e bloki referi. Su participacion den e accionnan ta conforma den 50% propiedad di Repsol y 50% di Eni, segun PDVSA.
