Gobierno Venezolano ayera a duna orden pa expulsion di cabesante di delegacion di Union Europeo na e nacion Sur Americano despues di e decision di e bloc di impone sancionnan riba varios oficial Venezolano acusa di socava democracia of viola derechonan humano.
A duna Isabel Brilhante Pedrosa 72 ora pa bandona e pais. Minister di Relacionnan Exterior Venezolano, Jorge Arreaza a bisa cu Brilhante Pedrosa a ser declara persona non grata pa decision di presidente Nicolas Maduro.
“E circunstancianan di agresion no ta laga opcion” pa motibo di e “falta di respet pa ley internacional publico” di acuerdo cu e Convencion di Vienna riba relacionnan diplomatico, Arreaza a bisa den un declaracion despues di reuni cu e diplomatico Europeo na Caracas. “Nos ta hacie pasobra ya tin 55 decision, di loke nan ta yama sancion den sistema di UE of Merca, comosifuera nan tin autoridad moral, cual nan no tin, ni legal, pa impone cualkier castigo riba ciudadanonan di otro pais”, Arreaza a bisa.
E movida di gobierno Venezolano a yega dos dia despues cu ministernan di Relacionnan Exterior Europeo a sanciona 19 oficial Venezolano, freeze nan bienes y prohibiendo nan di biaha na e bloc, citando e situacion den deterioro cu Venezuela ta enfrenta despues di eleccion na december 2020. E partidonan principal di oposicion a boycott e eleccion aki.
Te awo, Union Europeo a sanciona 55 oficial Venezolano.
Ta segundo biaha den casi ocho luna cu ta declara Brilhante Pedrosa como persona non grata y ordena pa bandona Venezuela. E medidanan ambos biaha ta relaciona na e sancionnan imponi pa e bloc Europeo contra oficialnan y aliadonan di Maduro.
