Venezuela a declara ayera e embahador di Spaña na Caracas, Jesús Silva, ‘persona non grata’ considerando cu su pais a comete “agresionnan continuo” contra gobierno di Nicolás Maduro.
“Venezuela ta haci di conocimento di comunidad internacional, cu a dicidi di declara persona non grata embahador di Reino di Spaña na Venezuela (…) pa e agresionnan continuo y e recurentes actonan di ingerencia den e asuntonan interno di nos pais,” un comunicado di Canciyeria Venzolano ta bisa.
Gobierno di Maduro a rechasa cu e hefe di gobierno di Spaña, Mariano Rajoy, a respalda e sancionnan di Union Europeo contra siete funcionario Venezolano, cu nan ta acusa di violacion di derecho humano o atenta contra democracia.
Venezuela ta acusa Rajoy di a “ricibi instruccion” di gobierno di Estadonan Uni pa impulsa e sancionnan, cu ta prohibi e funcionarionan, entre nan e number di Chavismo, Diosdado Cabello, y e presidente di poder electoral, Tibisay Lucena, pa biaha pa Union Europeo.
Segun Canciyeria di Venezuela, Rajoy a compromete su mes pa “asumi e liderazgo di e conspiracion na Europa, cu e meta di concerta atakenan riba soberania y independencia di pueblo Venezolano cu su socionan Europeo, a cambio di inconfesable beneficionan politico y economico.”
Diarason pasa, Venezuela a yama su embahador na Spaña, Mario Isea, despues di e sancionnan di Union Europeo cu tambe ta afecta ministro di Interior, Néstor Reverol, y presidente di Tribunal Supremo di Husticia (TSJ), Maikel Moreno.
