Por lo pronto no ta yega un fin na e ola di protesta contra regimen di presidente Nicolas Maduro. Aparte di e capital Caracas, den hopi otro municipio di e pais tin protesta casi diario, specialmente despues di e anuncio di parti di gobierno di e deseo di tene un ‘Asamblea Constituyente’, cu e meta pa yega na un constitucion nobo.

E constitucion actual ta data di 1999, tempo cu e predecesor di Maduro, Hugo Chavez, a haci uzo di su mayoria abrumador den Asamblea Nacional pa introduci e actual constitucion di Republica Bolivariano di Venezuela. E contrincantenan di Maduro ta kere cu e constituyente no ta nada mas cu un intento pa deshaci di e obligacion actual di tene eleccion prescribi pa e actual constitucion.

Mientras tanto, e ex-presidentenan di diferente pais, cu a interveni na fabor di un dialogo na Venezuela durante 2016, Leonel Fernandez di Republica Dominicana, Martin Torrijos di Panama y ex prome ministro di Spaña, Jose Luis Rodriguez Zapatero, a reuni diasabra ultimo na Santo Domingo. No a sali nada ainda den publicidad di e contenido di e encuentro, pero ta anticipa cu e personanan en cuestion lo ta tratando di yega na un intento nobo di dialogo na Venezuela. Den esaki posiblemente nan lo por conta cu colaboracion di ex-presidente di Colombia, Ernesto Samper.

Entre tanto na Venezuela a continua varios suceso di protesta. Un grupo di deportista a organisa un careda na pia di 15 km na Caracas, desde avenida Rio de Janeiro dedica na e personanan cu a fayece como victima den e protestanan di ultimo luna. E careda lo a termina na Parque Generalisimo Frnacisco de Miranda.

Na Roma, un grupo di Venezolano a aparece riba Plaza San Pedro di Vaticano, unda Papa Francisco ta aparece diadomingo pa dirigi e oracion di Regina Coelli. E participantenan tabata hiba cruz preto cu e nomber di e personanan cu a fayece den e ultimo tempo, desde cu e protestanan riba caya a cuminsa.

A base di un yamado un biaha mas di oposicion politico un gran multitud a reuni riba e caretera principal di Caracas, e autopista Francisco Fajardo. Atrobe e intentonan di avansa a topa cu represion fuerte di e cuerponan uniforma, cu a haci uzo di gas lagrimogeno y awa pa core cu e manifestantenan.