E canciyer di gobierno di Nicolas Maduro, Jorge Arreaza, a celebra ayera e incorporacion di Venezuela den Conseho di Derecho Humano di Nacionnan Uni (ONU), cu el a cataloga como ‘historico’.
“E ta un victoria historico di Venezuela den Conseho di Derecho Humano di ONU,” agregando cu “Estadonan Uni a yega na desprecia multilateralismo, te cu nan a retira di Conseho di Derecho Humano, y di Acuerdo di Paris.”
El a destaca cu ‘tur e paisnan alinea cu Estadonan Uni tabatin e mesun discurso pa trata di tene Venezuela pafo di e Comision di Derecho Humano’.
“Nos no a ataca ningun hende, nos no a traha ningun strategia pa ataca ningun candidato,” el a agrega. El a gradici e gobiernonan cu a vota pa Venezuela, y ONU. “Venezuela tin propuesta pa no tin intervencion arma mas, pa no existi blokeo economico mas.”
El a señala cu ‘ta lamentable cu Costa Rica a postula cu e unico meta di impedi cu Venezuela lo a yega na e puesto. Diplomacia multilateral ta ser haci cu propuesta, pa tuma decision entre tur miembro. Estadonan Uni no tin ni moral pa papia di sancion’.
Julio Borges, canciyer di gobierno interino di Juan Guaido, a revela cu e victoria di regimen di Nicolas Maduro den ONU a ser hipoteca cu apoyo di dictadura Cubano, pero cu ‘e maniobra aki lo no sirbi pa oculta nan crimennan. E democracianan electo den e organismo aki lo cerca e dictadura mas ainda y lo expone nan violacion di derecho humano’, el a manifesta a traves di su cuenta oficial riba red social Twitter.
