(LaPatilla) – E ginecologo/obstetra di e Unidad del Centro Valenciano de Fertilidad y Estetilidad, Nigme Rosquete, a alerta e ciudadanonan pa ta atento na e dokternan falso di e area cu actualmente ta ofrece “bon prijs” manera trampa pa haya cliente, asina Union Radio a señala.
E hecho di introduci un dispositivo straño, specificamente un implante anticonceptivo, di origen desconoci, no desinfecta of falso, lo por crea complicacionnan severo, entre nan reaccionnan inmunologico, procesonan di infeccion cu por pone den riesgo e bida di e persona. Un obheto cu no ta traha pa pone den e curpa di un persona y cu por tin un bacteria, por infecta e curpa di manera rapido.
“Henter e gremio medico y ginecologonan ta impacta di e grado di iresponsabilidad di e hecho aki, un violacion no solamente na hende muhe y su derechonan reproductivo, si no di hunga cu e victimanan ey cu tabata kier un planificacion di bida y di bisa mi no ta den capacidad di tin yiu. Ademas cu nan ta pone den riesgo e salud di e hende muhenan”, Rosquete a remarca den un entrevista cu Union Radio.
E recomendacion di e specialista ta pa no kere den e publicacionnan engañoso cu ta circula ariba rednan social tocante e colocacion di implante- y dispositivonan na prijsnan cu ta yama atencion, y busca profesionalnan certifica den e area.
E metodonan anticonceptivo ta varia dependiendo di e necesidadnan di cada hende muhe, tin algun di nan cu ta sinti comodo cu e pildonan pasobra nan ta facil di controla y nan ta organisa, sinembargo otronan ta prefera e dispositivonan y implantenan.
