Standard & Poor’s (S&P), un di e principal agencianan di calificacion crediticio, a mehora perspectiva di Citgo Holding Inc y Citgo Petroleum Corporation, kitando nan di e lista di entidad cu perspectiva negativo y poniendo nan den perspectiva stabiel.
S&P a reafirma e calificacion crediticio di emision a largo plaso di ambos entidad na B-, y a anuncia cu a mehora e rating individual di ambos, pasando di BB- pa BB. E mehoracion den e rating di S&P ta bin despues di e reciente actualisacion di e calificacion di Fitch Ratings, di mita di juli, cu ta pone Citgo den un posicion mehora cu proyeccion di perspectiva stabiel.
“Desde cu nos a keda designa na februari, e Hunta Directivo di Citgo tabatin como enfoke principal y prioridad, e stabilidad financiero di e empresa,” Luisa Palacios, presidente di e Hunta Directiva a bisa. “E mehoracion reciente di e calificacion crediticio di entidadnan di Citgo, tanto di S&P como di Fitch Ratings ta refleha e progreso riba e frente aki. Nos ta spera di por continua cu optimismo cu e crecemento, specialmente awor cu Carlos Jordá como e presidente ehecutivo nobo di Citgo.”
Jordá, di su parti a agrega cu e mehoracion den e rating y perspectiva di S&P y Fitch Ratings, hunto cu e exitoso refinanciamento di e debe, ta indicativo di un confianza halto di mercado den e empresa. Na inicio di augustus Citgo a anuncia un exitoso refinanciamento di nan debe cu lo resulta den spaar mas di US$ 200 miyon den cinco aña.
