Den prome semester di 2019 a detene 19.028 ciudadano na Venezuela, loke a aumenta e problema di demasiado preso den celnan policial di e pais, cu tin capacidad pa 3.734 persona so, segun informe di e ONG ‘Una Ventana a la Libertad’.
E Criminologo y Psicologo Venezolano Magally Huggins a bisa na un forum encuanto e situacion di derecho humano den centronan di detencion preventivo (CDP) na Venezuela, cu e situacion a bira mas grave cu detencionnan durante e protestanan contra regimen di Nicolas Maduro for di januari di e aña aki.
“Esey tabatin un respuesta inmediato, cu tabata violencia y represion. Y esey a yega inmediatamente na e centronan di detencion preventivo. E situacion a empeora mesora pasobra tabata manda e detenidonan inmediatamente pa e centronan,” Huggins a señala.
E Psicologo a elogia e informe di e Alto Comisionado pa Derecho Humano di Organisacion di Nacionnan Uni, Michelle Bachelet, cu a expone e condicionnan deteriora na e pais.
Huggins a adverti tambe pa e situacion na estado Zulia, unda su organisacion ta anticipa un masacre di un momento pa otro. El a califica como genocidio interno e casi 120 mortonan cu a cay den e celnan den prome seis luna di 2019. El a expone cu e prome causa di morto den e celnan ta desconoci, e di dos ta debi na intento di huy, di tres ta pa golpi, motin y enfrentamento, e di cuatro ta enfermedad, y di cinco ta abuso policial.
