E productonan mas busca den e dianan aki na Venezuela ta jerrycan, bela y bateria, pa temor cu no lo yega un fin na e falta di coriente, cu tin un cantidad di consecuencia.
Falta di luz ta causa cu no tin suministro di awa, no tin metro na Caracas, loke ta pone transporte cu bus bao presion pa e cantidad di hende cu mester por yega nan scol of trabao. Falta di awa principalmente den e partinan urbano ta aumenta e desesperacion, tambe pa e problemanan higienico cu esaki ta ocasiona. Banda di e custumber di cana busca cuminda pa oranan largo, awor mester haci esaki tambe pa haya awa.
Nicolas Maduro a anuncia den un transmision di television diadomingo anochi un plan di 30 dia di “regimen special di administracion di carga”, un frase cu riba rednan social a interpreta mas tanto como un racionamento di servicio di energia. Maduro no a ofrece detaye di con e plan lo funciona. Tambe ayera ainda scol y lugarnan di trabao a manece cera, o cera parcialmente, mirando e suministro selectivo di coriente.
Despues di tres blackout grandi luna pasa, cu a afecta servicio di awa y telefon, e poblacion tin miedo cu tin mas na caminda y hasta cu e blackoutnan frecuente lo bira e normalidad nobo, y ta busca tur clase di alternativa pa por tin algo di luz y awa.
E protestanan cu tabatin na varios parti di e pais, a conduci na violencia, ora cu miembronan di e conocido ‘colectivonan’ Chavista a tira riba e multitud heridadndo dos persona.
Mientras cu Nicolas Maduro ta bisa cu ta sabotahe di oposicion, expertonan ta adverti cu e crisis, cu tabata existi pa un decada caba, ta debi na falta di inversion y mantenimento di infrastructura, y no tin soolucion inmediato.
