“E sancionnan riba nan mes no ta bay detene e regimen di Maduro y Estadonan Uni tin cu cuminsa considera e uso di militar activo pa hiba ayudo pa e miyones di Venezolano hambriento y malo,” asina senador Republicano pa Florida, Rick Scott, a pone riba su cuenta di Twitter.
“Estadonan Uni ta enfrenta un menasa grave pa seguridad nacional y un crisis humanitario na nos porta. Esaki ta birando mes peligroso pa nos cu e guera civil na Siria tabata pa Europa, Israel y Jordania,” el a sigura.
E ex-gobernador di Florida tambe a haci un yamado na “tur nos aliadonan” pa apoya e presidente encarga di Venezuela, Juan Guaido den e esfuerso aki.
“No kiboca; esaki ta un crisis. E ta un crisis humanitario cu ta menasa bida di pueblo Venezolano y a crea un avalancha di refugiado cu ta yega na miyones,” Scott a recorda, y a agrega cu “ta birando evidente cu nos lo meser considera e uso di militar activo Mericano pa ofrece ayudo. Maduro y su matonnan no a laga nos otro opcion.”
Pa e Republicano, e caminda pa socialismo elegi pa e Chavistanan “inevitablemente a conduci na un estado fracasa” y e resultado ta “un di e crisisnan humanitario mas grave den historia di nos hemisferio.”
Scott a termina: “Mi mensahe awe ta e siguiente: Estadonan Uni ta respalda e patriotanan di Venezuela cu ta lucha pa defende nan bida, nan libertad y honor.”
