Comision di Relacion Exterior di Senado Mericano a aproba diaranson pasa e proyecto di “Ley Verdad” (“Verdad Act”), cual tin como meta brinda apoyo na e Venezolanonan den nan lucha contra e dictadura actual.
Entre otro, e ley ta aproba US$ 400 miyon na ayudo humanitario na Venezolano, tanto na Venezuela como den exterior. Tambe e ley ta encera sancion contra aliadonan di e regimen di Maduro. Esaki ta concerni tanto gobierno como funcionario individual. Ademas e ley ta ratifica e apoyo na gobierno interino di Juan Guaido y ta apoya buskeda di un solucion “pacifico y democratico” pa e crisis actual na Venezuela.
Tambe e ley ta bin cu prohibicion di visa pa aliadonan di Maduro; tambe prohibicion pa famia di esunnan cu ta apoya regimen di Maduro y cu ya ta sanciona. E ley ta rekeri autoridadnan Mericano pa vries, recupera y reutilisa bienes di persona corupto, tambe na nivel internacional, specialmente di funcionarionan Venezolano.
E ley ta contempla ademas planificacion pa reconstruccion economico di Venezuela. Esaki mester bay hunto cu e institucionnan internacional financiero manera IMF y Banco Mundial, na momento cu logra “restauracion di democracia” na e pais.
Di otro banda, e ley ta duna e posibilidad tambe pa kita sancion pa persona, cu no a comete violacion di derecho humano y cu ta pasa pa reconoce Juan Guaido como “presidente interino” di Venezuela.
