(LaPatilla) – Sector turismo di Venezuela a celebra e yegada, diamars ultimo, di e prome crucero procedente di Europa den 15 aña, e barco Amadea, cu a yega e isla de Margarita cu casi 500 pasahero y ta spera cu otro liñanan internacional por cuminsa inclui e pais Caribense den nan destinonan.
Presidente di e Consejo Superior de Turismo (Conseturismo), Leudo Gonzalez, a bisa EFE cu pa e sector ta un bon noticia cu e pais a ricibi e barco crucero na isla de Margarita cu alrededor di 500 turista internacional, despues di hopi aña sin ricibi e tipo di bishitanan aki.
“Nos ta spera cu e yegada aki por habri e rutanan di otro liñanan di crucero, cu nan tene na cuenta den nan schedule e isla de Margarita como un destino importante den Caribe, y cu esaki por aumenta e yegada di turistanan inertnacional,” el señala.
Igualmente el a indica cu e 498 turista Europeo lo bishita diferente luga atractivo di e Perla di Caribe, manera ta conoce isla de Margairta, cu cual nan lo conoce kico Venezuela ta ofrece desde e punto di bista di turismo.
“Nos ta spera cu tur cos lo sali bon, cu e hendenan por bay contento, cu nos por logra cumpli cu e expectativanan pa asina, di e manera ey, fomenta e yegada di barconan nobo,” el a agrega.
Den e sentido aki, presidente di Camara de turismo di Nueva Esparta, Viviana de Vethencourt, a bisa EFE cu e tin speransa cu e yegada di e crucero aki por replica cu e demas liñanan di crucero pa otro embarcacionan por yega.
“Esaki ta trece beneficio pa tur esnan involucra den e atencion directo y indirecto, pasobra e turismo ta traspasa den tur e sectornan. E ta hopi positivo, hopi bon,” el a agrega.
