(ElNacional) – Un ehemplo pakico no por bisa ainda cu economia di Venezuela ta recuperando na 2022 ta e situacion den sector di construccion, cu tin problema pa reinicia despues di nuebe aña di caida continuo.
Considera un di e exponentenan fuerte di crecimento di un pais, e sector ta mustra un paralizacion di 90% di su actividad y construccion nobo di vivienda y oficina cu por observa actualmente, principalmente den capital Caracas, ta mustra insuficiente pa sigura un dinamizacion real di e industria. En concreto, construccion di vivienda nobo ta keda un problema y no a logra mucho pa reduci e deficit di vivienda. Representantenan di e sector a indica cu varios factor ta impedi e crecimento di e industria, manera e situacion economico precario, leynan cu ta impedi desaroyo, nacionalizacion di henter e cadena di suministro y e excesivo oferta di inmueble, pa gran parti laga atras pa e diaspora Venezolano.
Presidente di Camara Venezolano di Construccion (CVC), Enrique Madureri, a resalta cu e sector ta “totalmente den contraccion”, ya cu actualmente e ta representa 2% di e tamaño cu e tabatin na aña 2012. El a insisti cu ta prioritario rehabilitacion di e infrastructura di servicio publico, specialmente di electricidad, ya cu ora construccion cuminza opera cu mas forza, electricidad no ta bay yega, debi na e suministro abao den MegaWatt.
Madureri a indica cu construccion di edificio nobo tabata casi nulo. Si antes sector priva tabata construi 100.000 unidad pa aña, awor ta 1.000, aproximadamente. “E deficit di vivienda ta keda, den cifra grandi, esey nos mester atende y esey ta solamente posible si tin cambio den e leynan cu ta regula e sector.”
E vice-presidente di CVC, Rafael Torrealba, a señala cu un muestra cu no tin un dinamica fuerte den construccion ta e produccion di cement y staal cu ta continua na mesun nivel di seis luna pasa. Segun fuentenan oficial, e capacidad utiliza di e empresanan estatal di cement ta na 10% mientras di staal ta na 5%.
